ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

स्मार्ट लकडाउन ः धायेगु जक का ! संक्रमणया जोखिम झन् अप्वल !

स्वनिगःया ब्यापारिक केन्द्र असं बजाःया फुटपाथ पसलय् थौंकन्हय् आपालं भीडभाड जुयाच्वंगु दु । थथे भीडभाड खनीबलय् सकलसिनं सहज रुपं अनुमान यायेफइ कि आः कोरोना महामारीया जोखिम हे मदयेधुंकल । थौंकन्हय् बजाःया पसः धा, सतक हे धाः, न सामाजिक दूरी कायम जूगु दु, न मास्क तयेगु तरिका हे सही जुयाच्वंगु दु ।

कोरोना महामारीयात लक्षित यानाः निर्धारित जनस्वास्थ्यया मापदण्डबारे पसःथुवाः, ग्राहक अले लँजुवाः सकलसिनं स्यूगु हे खँ खः । तर उकिया पालनाय् थौंकन्हय् सुं नं जिम्मेवार जूगु खनेमदु । 

ब्यापारीपिनिगु नुगलय् कोरोना संक्रमण जुइ कि धैगु ग्याःचिकुं थाय् कयाच्वंगु दु व इपिं ग्यानाच्वंगु दु । मनूतय्गु भीड खनकि नुगः ग्याःसां नं ल्वय् सिबें पित्याः प्वाथं अप्वः ख्यानाच्वंगुलिं पसः चायेकेमाःगु व्यापारीपिन्सं धाःगु दु ।

स्मार्ट लकडाउनया न्हापांगु दिंनिसें जक मखुसे वसिबें न्ह्यः नं प्रहरीया मिखाय् धुलं छ्वाकाः न्हिथं ब्यापारीपिन्सं सुथय् ११ ता ईतक थःपिनिगु व्यापार यानाः वयाच्वंगु दु ।

सरकारं बैशाख १६ गतेनिसें जारी याःगु लकडाउनयात असार ७ गतेनिसें छ्वासुकाः स्मार्ट लकडाउन न्ह्याकूगु खः । स्मार्ट लकडाउन अन्तर्गत न्हापांगु दिं बुधवाः सुथय् ११ ता ईनिसें न्हिनय् ४ ता ईतक येँया ब्यापारिक केन्द्र न्यूरोड, असः क्षेत्रया कापः, फेन्सी, कस्मेटिक, साडी, गिफ्ट आइटम, टेलरिङ्ग, डिपार्टमेन्ट ग्रोसरी स्टोर बाहेक खुल्ला जूगु खः ।

येँया मू ब्यापारिक केन्द्र न्युरोड, असं, महाबौद्ध क्षेत्रया पसः, गोदाम लखे फुटपाथय् जनस्वास्थ्यया मापदण्ड पालना मयाःसे याःगु ब्यापार व्यवसायं संक्रमितया ग्राफ थाहाँ वनीगु निश्चितथें हे जूगु जनस्वास्थ्यविदपिन्सं धाःगु दु ।

स्मार्ट लकडाउनया हे झ्वलय् बुधवाः बिशाल बजारय् नं ग्राहकपिनिगु भीडभाड आपालं खनेदूगु खः । पसः वइपिन्सं बजाः चालेधुंकाः जोखिम अप्वःगु स्वीकार याःगु दु । तर मास्क तयेगु लिसेलिसें जनस्वास्थ्यया मापदण्ड पालना याइपिंसिबें मयाइपिं अप्वः दूगु नं जनसमुदायपाखें वयाच्वंगु दु । 

येँया इन्द्रचोकय् नं पुलांपिं ब्यापारीपिन्सं ताःई लिपा पसः चाःगुलिं ग्राहकपिनिगु भीड जूगु धाःगु दु । ब्यापारीपिन्सं न्हिनय् ४ ता ईतक पसः चाइगु व चीधंगु थासय् च्वंगु पसलय् वःपिं ग्राहकपिन्त गथे यानाः वयेमते धायेगु धकाः नं धाःगु दु । सामाजिक दूरी कायम यानाः पसलय् वा धायेबलय् तुरुन्त हे इन्द्रचोकय् ताःहाकःगु लाइन जुइगु खँ नं ब्यापारीपिन्सं धाःगु दुसा ब्यापारीपिन्सं ग्राहकयात पंसा मेगु पसलय् वनीगु जूगुलिं नं कोरोनलिसे ग्यानाः गुजारा मजुइगु खँ नं धाःगु दु ।

सरकारं कोरोना संक्रमणया जोखिम कायम जूगु धासें डेढ महिना ताःहाकःगु लकडाउनयात स्मार्ट लकडाउन् हिलाः असार ७ गतेनिसें बार कथं थीथी ब्यापार व्यवसाय पालंपाः चायेकेगु व्यवस्था मिलेयाःगु दु । तर, भीडभाड म्हो यायेगु नितिं व्यापार व्यवसाय पालःपः याःसां नं न्युरोड, इन्द्रचोक, विशाल बजार, असं क्षेत्रय् पार्किङ याइगु सवारी साधनया ल्याः स्मार्ट लकडाउनय् व मेमेगु ईया तुलनाय् बराबर जूगु पार्किङया कर्मचारीपिनसं धाःगु दु ।

न्हापा नं न्हिथं ५÷६ हजार तका दां संकलन जुइगुलि आः नं वहे हाराहारीइ पार्किङ शुल्क उठेजुयाच्वंगु पार्किङ कर्मचारीपिन्सं धाःगु दु । लकडाउनया ताःहाकःगु ई लिपा बुधवाः चाःगु पसलय् जनस्वास्थ्यया मापदण्ड पालना मयाःसे वयेवने याइपिनिगु ल्याः आपालं दूगुलिं कोरोना संक्रमण तीव्ररुपं ब्वलनेफइगु जनस्वास्थ्यविज्ञपिन्सं धाःगु दु ।

ब्यापारीपिन्सं ल्वय् सिबें नयेपित्याःप्वाया हुनि क्यंसें जनस्वास्थ्यया मापदण्ड कथंया सामाजिक दूरी, मास्क, सेनिटाइजरया छ्यलाबुलाय् वास्ता मयाःसे ब्यापार यायेगु, ग्राहकं नं जनस्वास्थ्यया मापदण्ड पालना मयाःबलय् हाकनं कोरोना संक्रमण अप्वयेफूगु जनस्वास्थ्यविज्ञपिन्सं धाःगु दु ।

सरकारं स्मार्ट लकडाउनय् भीडभाड म्हो जुइगु कथं बजार चायेकेगु, सवारीसाधन चलेयाके बिइगु नीति दयेकूसां नं व्यावहारिक जुइमफूगु स्वास्थ्यविज्ञपिन्सं धाःगु दु ।

जनस्वास्थ्यविज्ञपिन्सं धाःगु दु, ‘कोरोना संक्रमणया चेन ब्रेक मयाःसे फुक्कसित अलमल याइगु स्मार्ट लकडाउनय् पसलेपिन्सं व्यापारया नितिं आतुर जुइगु, छगः हे गाडीइ कोचेजुयाः किनमेल यायेत वःबलय् झन् जोखिम अप्वःगु दु । झन् भीडभाड याकेगुसिबें फुक्क पसः चायेके ब्यूसा ज्यू कि । मखुसा नांथें लकडाउनयात स्मार्ट यायेफयेकेमाः । व कोरोना परीक्षण्, कन्ट्याक्ट टे«सिङ, पाइलटिङ रुपं परीक्षण मयाःसे स्मार्ट लकडाउनं जोखिम उच्च जूगु दु ।’

जनस्वास्थ्यविज्ञपिन्सं धाःगु दु, ‘येँ महानगरपालिकां सवारीसाधनया पार्किङया व्यवस्थापन याःथें स्मार्ट लकडाउन ई ज्वःछि छखेपाखें किनमेल याःवनेगु व मेखेपाखें लिहाँ वयेगु व्यवस्था। भीडभाड जुइगु व्यापारिक केन्द्रय् महानगरया प्रहरीयात परिचालन यायेमाः ।’

योजना दयेकाः लकडाउन याःगु जूसा स्मार्ट लकडाउन जुइ, तर थ्व नां जकया स्मार्ट लकडाउन जूगुलिं महामारी हाकनं अप्वयेफूगु जनस्वास्थ्यविज्ञपिन्सं धाःगु दु ।