1142 nhoo dan adv

स्मार्टफोनं चायेकेफइ छेँया मूलुखा

२०७१ चैत्र २५, बुधबार १०:०५:४५

मू लुखाया ताःचाः, कोथाया ताःचाः, दराजया ताःचाः, मोटरसाइकल–गाडीया ताःचाः... गनं पिने वनेमाल कि फुक्कथाय्या ताःचाःप्वाँय् ज्वनाः जुइमालीगु थौंया अवस्था चीकेत आः स्मार्टफोनं ग्वाहालि याइगु जूगु दु । स्मार्टफोनया ग्वाहालिं छेँया ताःचाः चायेकेफइगु जूगु दु ।

स्मार्टफोन, स्मार्टवाच लिपा आः स्मार्टलकपाखें छेँया सुरक्षा जुइ । थुकियात अगष्ट नांया छगू कम्पनीं दयेकूगु दु ।

थुकिया निंतिं थःगु स्मार्टफोनय् छगू एप डाउनलोड यायेमाली । थुकिं ताःचाःयात वं हे जक चायेकेफइ सुनां मोबाइल एप्सय् रजिस्टर्ड यानातःगु दइ । थः छेँजःपिनि नांयात नं एप्सय् रजिष्टर्ड याकाः ताःचाः चायेकेफइ ।

एप्सय् छगू कोड तयेमाली गुकियात धाःसा छम्ह जक मनू नं सीकेफइ ।

यदि प्यम्ह छेँजःपिंसं एप्स डाउनलोड याःसां उमिसं ताःचाः चायेकेत एप्सय् विशेष कोड तयेमाली । अथेहे एप्सय् विशेष कोडया निंतिं ई नं क्वःछिइफइगु सुविधा तयातःगु दु ।

अमेरिका व युरोप थेंजाःगु विकसित देयया निंतिं दयेकातःगु थुगु एप्सया मू आःया निंतिं २५० अमेरिकी डलर क्वछिनातःगु दु ।

न्यनेबलय् न्ह्याइपुसे च्वंसां थुगु एप्सया सुरक्षायात कयाः सुरक्षा एजेन्सीत उत्साहित खनेमदु । मोबाइल फोन याकनं ह्याक जुइफुगुलिं थःगु छेँया मू सुरक्षाया दृष्टिं एप्स उलि लोकंह्वाइगु खँय् उमिसं शंका नं तःगु दु । एप्स्यात सुनां ह्याक यानाबिल धाःसा छेँय् दुहां वनेगु गथे ? उमिसं न्ह्यसः तइ ।