नेवा: अनलाइन न्युज – ललेन्द्र शाक्य | २०७८ आषाढ ५, शनिबार १२:५८:३०

स्पेनी प्रधानमन्त्री पेड्रो सान्चेजं जुन २६ निसें छेँपाखें पिहाँ वयेबलय् अनिवार्य रुपं मास्क तयेम्वाःलीगु धाःगु दु ।

प्रधानमन्त्री सान्चेजं शुक्रवाः बार्सिलोनाय् इकोनोमिक फोरमं ग्वसाः ग्वःगु ज्याझ्वःयात सम्बोधन यासें बहुप्रतिक्षित घोषणा याःगु खः ।

समाजवादी नेता सान्चेजं धाःगु दु, ‘४ करोड ७० लख स्पेनी देशभक्तपिं दथुइ छगू महत्वपूर्ण घोषणा याये चाहेजू । मेगु बिहिवाः जिमिसं छगू असाधारण मन्त्रिपरिषदया बैठक ग्वसाः ग्वयेगु जुइ व बैठकय् जुन २६ निसें छेँपाखें पिहाँ वयेबलय् खुल्ला थासय् अनिवार्य मास्क तयेमाःगु नियमयात चिइकेगु प्रस्ताव हयेत्यनागु दु ।’

सरकारया थ्व निर्णयलिसें सामाजिक दूरी कायम यायेफइगु खुल्ला थासय् नं मास्क अनिवार्य तयेमाःगु झन्झट वइगु वाःनिसें चिलीगु जूगु दु । तर, सार्वजनिक यातायातया फुक्क यात्रुपिनिगु नितिं अझ नं मास्क अनिवार्य यायेमाःगु खनेदूगु दु । अय्सां नं नियम बारेया विवरण छुं दिं दुने सार्वजनिक सार्वजनिक जुइत्यंगु दु ।

वंगु दँ मे ४ निसें दकले न्हापां क्याटालोनिया क्षेत्रय् सार्वजनिक यातायातया फुक्क यात्रुपिनिगु नितिं मास्क अनिवार्य याःगु खः । उकिया निवाः लिपा स्पेनिस सरकारं छेँपाखें पिहाँ वयेबलय् खुल्ला थासय् नं अनिवार्य रुपं मास्क तयेमाःगु नियम देय् न्यंकं लागु याःगु खः ।

स्पेनय् आः ४० निसें ५० दँया उमेर समूह नं कोरोनाविरुद्धया खोप कायेगु क्रम जारी जुयाच्वंगु दु । वइगु महिनानिसें ३० निसें ४० दँ उमेर समूह नं खोप कायेखनीगु जूगु दु ।

कोरोना महामारीया चरम संकटय् फसेजुयाः निक्वःतक संकटकाल घोषणा यायेत बाध्य जूगु स्पेन आः धाःसा सामान्य अवस्थापाखे लिहाँ वनाच्वंगु संकेत क्यंगु दु ।

Categorized in अन्तर्राष्ट्रिय