Header Nepal rastra bank Adv

स्थानीय तहया निर्वाचनय् कुर्कीगु भोटं झीत हे घातक मजुमाः

नेवा: अनलाइन न्युज – ललेन्द्र शाक्य | २०७९ बैशाख २६, सोमबार १३:४४:०८

रिदेन महर्जन, किपू – १

बैशाख ३० गतेया स्थानीय तह निर्वाचन २०७९ सतिनाः वयाच्वंसां नं नेपाःमि जनतात न्हापाथें उलि उत्साहित मजूगु खनेदु । देय् न्यंकं न्ह्याथाय् स्वसां नं भ्रष्टाचार, हत्या हिंसा, लूटतन्त्र, आतंक, बलात्कार, बिसंगति विकृति जक ब्वलनाः च्वंगु दु । नेपाःया सत्तारुढ दल नेपाली कांग्रेस, माओवादी केन्द्र, जनता समाजवादी पार्टी, नेकपा एकीकृत समाजवादी लगायत न्यागू दलीय गठबन्धन यानाः चुनावी मैदानय् थुगुसी ब्वति काःगु दुसा अथेहे एमाले राप्रपालगायत थीथी पार्टीत नं थाय् अनूकल जनतातय्त ध्वँ लायेगु माध्यम दयेकाः नाटकीय ढंगं राजनीतिक पार्टीपिं गठबन्धन यानाः चुनावी मैदानय् होमय् जूगु दु ।  

नेपाःया सार्वभौम, अखण्डता व स्वाधीनताय् बांमलाक्क लिच्वः लाइगु कथं राष्ट्रघाती एमसीसी पास याःगु हुनिं थुगुसी चुनावय् न्ह्याःगु हे राजनीतिक पार्टी उम्मदेवारी त्याःसां नं शोषित, उत्पीडित न्यायप्रेमी जनतात मत्याइगु निश्चित जूगु दु ।  उकीमध्ये नं नेपाः देय्या केन्द्रबिन्दु झीगु स्वनिगलय् न्हापाया स्थानीय तहया चुनावय् कांग्रेस, एमाले, नेकपा माओवादी  लगायत थीथी राजनैतिक पार्टीपिन्त थनया स्थानीय जनतापिन्सं त्याकेज्या याःसां नं थौंतकया उप्लब्धी छु खः ? अले छु हे बिल थनया जनतापिन्त इमिसं ? गुलितक अन्याय अत्याचारय् लाःपि जनतापिन्त न्याय बिइफत ? जनतापिन्त थुकिया ल्याःचाः बिइमाःगु दु ।

राजनीतिक दलया नेतातय्सं जनतापिन्त बरु ‘चाकु क्यनाः भुजिं लायेगु’ ज्या जक यानाः च्वंसां नं  न्ह्यलं मचाःनि जनतात !

स्वनिगलय् अनेतने विकासया नामय् विनास योजना दयेकाः स्थानीयबासीपिन्त विस्थापित योजना दयेका गाकं दुखः बिइगु ज्या जक यात, उकीमध्ये नं येँय् बालाजु बाइपास लगायत थीथी थासय् अन्तराष्ट्रिय आईएलओ १६९ कानूनविरुद्ध, देय्या संविधान कानून अःखः, गैरन्यायिक, गैरकानूनी रुपं ‘माथिको आदेश’ धकाः तात्कालिन केपी ओली सरकारया पालय् सच्छि छेँखासिबें मल्याक स्थानियबासीपिनिगु छेँ गैरन्यायिक, गैरकानुनी तवरं थुनेगु याःगु घालं यानाः आपालं जनतात घाः सहयायेमफया अकालं प्राण त्याग तकं यायेमाल, गुलिं थःगु छेँ त्वःताः बालं च्वना कष्टकर जीवन हनेत बाध्य जुल । छाय् जक जुइ थुपाय् सकं दोजर आतंक मच्चे याःसां नं उब्लेया स्थानिय सरकारया जनप्रतिनिधिपिनिगु न्हायपनय् चिकं तयाः ताःसां मताः पहः यानाच्वन ? थुकिया लिसः बिइ हे माः आः ?

बास्तवय् धायेमाल धाःसा जनतात हे देय्या थुवाः खः, शक्ति खः, आः जुइपिं मेयर, उपमेयर, वडा अध्यक्ष, सदस्य धयागु जनताया छगू कंथ प्रतिनिधि जक खः । थुपिं हे सकतां मखु, जनताया शक्ति म्हसिकेगु धयागु हे चुनाव खः । थुकि स्थानीयबासीपिन्सं अझ विशेष यानाः विचाः याये हे माः ।

हलिं न्यंकभन झी नेवाःतय्गु कला, संस्कृति, भाषा, तजिलजि हे नेपाः देय्यात म्हसिका बियाच्वंगु दु । गुकियात निरन्तरता बिइगु हे झीगु गुथि खः । झीसं खोकना फास्ट ट्रयाक आन्दोलन, गुथि विधयेक आन्दोलन नं लोमंके मज्यू, सुसु राजनीतिक पार्टीं झीत पासा बिल, सुना याना थथे जुल, उगु घटनायात नं झीसं लोमंके मज्यू उकिसं झीगु एकता हे शक्ति खः । एकता दत धाःसा झीसं न्ह्यागु नं असम्भव ज्यायात सम्भव क्यनेत ताः लाइ । अथे जुया तसकं होस् यानाः जक थुगुसीया चुनावय् भोत कुर्किकेमाःगु खनेदु ।

आखिरय् न्ह्यागु हे पार्टीया सरकार वसान जनताया हे करं हे स्थानीय सरकार, प्रदेश सरकार चले जुइगु खः । उकिसं सत्ता शक्तिया भरय् फोहरी राजनीति म्हितिपिं सामान्ति नेताया शिकार जुइमज्यू आः जुइपिं जनप्रतिनिधिपिंं । आः तंक्क नं छाय् जक जुइ कानुन अखः दयेकातःगु थीथी सम्पदात लगायत थँबहीया ऐतिहासिक पलेस्वाँ पुखुलिइ छाँया सेन्टर दयेके ज्या बारय् सुंहे राजनीतिक पार्टीया मेयर, उपमेयर उम्मेदवारी जुइपिंसं पूखु हे कायम यायेमाः धकाः घोषण पत्रय् दुमथ्याकूगु छगू कथं थ्व नं अजुचाइगु विषय जूगु दु ।

देय्या संविधान, कानून कथं चुनावय् ब्वति कया भोट र्कुकाः जनप्रतिनिधि ल्यज्या यायेगु सकलसिगु अधिकार खः । अले हरेक जनताया पीर मर्का थुम्ह, जनताया घालय् वासः तैम्ह सक्षम जनप्रतिनिधि हे झीत माः । न्हापाया राजनैतिक पार्टीया जनप्रतिनिधिया बेइमानी थःपिनिगु कार्यकर्ता पोसे यायेगु ज्या यागुलिइ देशय् न्यंक स्वतन्त्र उम्मेदवारी बिइपिं थुगुसीया चुनावय् लहर चले जूगु दु । राजनीतिक पार्टीया जनप्रतिनिधिया असुन्तुष्टि लिच्वः खः थ्वः । गुकिया बारे थीथी राजनीतिक पार्टी नं आः हे विचाः याये हे मा, गथे यानाः स्थानीय जनतापिन्त अमनचयन, शान्ति बिया लय्तायेकैफइ ? अथेजुया मभिंगु संस्कार त्वःतेमाः आः जुइपिं जनप्रतिनिपिसं ।

गैर कानूनीन, गैरन्यायिक सतक विस्तारपिन्त न्याय बिइकेगु खँय् सः तयाः उचित न्याय बिइमफुगु धयागु छगूकथं झीगु कमजोरी पना क्यने ज्या जक जूगु दु । बरु झी हे दाजुकिजाःपिं, नेता मन्त्री जुपिसं तामासा स्वयेगु जक यानाः च्वन, झीगु नितिं जक नेपाः देय्या नितिं तसकं बांमलाःगु बिषय जूगु दु ।

थुगुसीया स्थानीय तह चुनावय् सकल स्थानीयबासीपिंस नं छु विचाः यायेमाः धाःसा थीथी पार्टीया उम्मेदवारी व स्वतन्त्र उम्मेदवारीया भिंगु ज्याया मुल्यांकनया आधार बांलापिं जनप्रतिनिधि ल्यज्या यायेमाः । न्हापाथें आः हानं थीथी पार्टीइ नेपाःमि जनतात चुनावया प्रचार—प्रसारय् होमय जुयाच्वंगु दु । गुगु इलय् जनताया छेँय् छेँय् डोजर आतंक मच्चे याबले छिकपिं गन सुलाच्वंन धकाः थुगुसी चुनावय् उम्मेदवारी जूपिन्त न्ह्यसः चिं तयेगु ज्या अनिवार्य हे यायेमालावःगु दु । थौंवया झी हे नेवाः दाजुकिजाः पिन्त थीथीपाखें पार्टीया न्ह्यबँसा दयेकाः उम्मेदवारी यानाः इमित छ्यला लवं कायेगु ग्वसाः ग्वयाच्वंगु वाः चायेका थःपिन्त सँदियौंनिसें जुयाच्वंगु विभेदय् छम्ह सँच्चाम्ह योद्धा पिहाँवयेमाः ।

चुनाव दंपिं उम्मेदवारपिंसं जनतापिन्त भोट कायेत भ्वँय् नकाः अनेतने आश्वासन, लोभ लालच क्यनेगु खँय् जनता स्वय्म हे सर्तक जुइहेमाः, छिसं ब्यूगु भोतं यानाः छिगु हे छेँय् दोजर आतंक जुइगु माध्यम मजुइमाः धयागु खँय् बारम्बार विचाः यानाः जक भोट बिइमाः थुकि प्रत्येक नेवाः तय्सं बिचाः यायेहेमाः

अथेजुयाः नेवाः तय्त जुयाच्वंगु अन्याय अत्याचारया सः थ्वयेकेगु ज्या यानाः पिडित पिन्त न्याय बिइगु ज्या जनप्रतिनिधिपिनिगु दायित्व खः । बिड्म्बना हे धायेहेमा झी नेवाः तय्के एकता मदया झी न्ह्याथय् नं झीपिं पीडित जुया म्वानाच्वने मासानं आः तक्क नं नेवाःतय्गु राष्ट्रिय संगठन लगायत थीथी संघसंस्था उलि चिउता काःगु मदु । गैर कानूनीन, गैरन्यायिक सतक विस्तारपिन्त न्याय बिइकेगु खँय् सः तयाः उचित न्याय बिइमफुगु धयागु छगूकथं झीगु कमजोरी पना क्यने ज्या जक जूगु दु । बरु झी हे दाजुकिजाःपिं, नेता मन्त्री जुपिसं तामासा स्वयेगु जक यानाः च्वन, झीगु नितिं जक नेपाः देय्या नितिं तसकं बांमलाःगु बिषय जूगु दु ।

 उकिसं चुनाव दंपिं उम्मेदवारपिंसं जनतापिन्त भोट कायेत भ्वँय् नकाः अनेतने आश्वासन, लोभ लालच क्यनेगु खँय् जनता स्वय्म हे सर्तक जुइहेमाः, छिसं ब्यूगु भोतं यानाः छिगु हे छेँय् दोजर आतंक जुइगु माध्यम मजुइमाः धयागु खँय् बारम्बार विचाः यानाः जक भोट बिइमाः थुकि प्रत्येक नेवाः तय्सं बिचाः यायेहेमाः, स्थानीय तह चुनावय् झीसं ब्यूगु भोटं झीतः हे घातक मजुइमाः । सुभाय् जय मांभाय्

Categorized in बिचा: