ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

सैनिक अस्पतालय् येँ महानगरबासीपिन्त निःशुल्क डायलासिस सेवा न्ह्यात

नेवा: अनलाइन न्युज – ललेन्द्र शाक्य | २०७८ आषाढ २७, आइतबार १६:३४:३७

येँया छाउनीइ च्वंगु वीरेन्द्र सैनिक अस्पतालय् येँ महानगरपालिकाया स्थानीय बासिन्दापिनिगु नितिं जलास्येँ (मिर्गौला) ल्वय्या ल्वगिपिन्त निःशुल्क हेमोडायलासिस सेवा न्ह्याःगु दु ।

आइतवाः अस्पताल परिसरय् छगू ज्याझ्वःया दथुइ येँ महानगरपालिकाया मेयर विद्यासुन्दर शाक्य व प्रधान सेनापति पूर्णचन्द्र थापां निःशुल्क हेमोडायलासिस सेवाया मंकाः कथं उलेज्या याःगु खः ।

येँ महानगरपालिकाया आर्थिक ग्वाहालि व नेपाली सेनाया व्यवस्थापनय् वीरेन्द्र सैनिक अस्पताल छाउनीइ आइतवाःनिसें जलास्येँया सेरो नेगेटिभ ल्वगिपिनिगु नितिं निःशुल्क हेमोडायलासिस सेवा न्ह्याःगु खः ।

सेवा न्ह्यायेधुंकाः बःचाधंगु प्रतिक्रिया बिसें महानगरपालिकाया मेयर शाक्यं महानगरवासीपिन्त स्वास्थ्य सेवा बिइगु कुतः कथं अस्पताललिसे सहकार्य यानागु धाःगु दु । जलास्येँ सम्बन्धी ल्वय् जुइन्ह्यं हे उकियात पनेत वा ल्वय् जुइधुंकूगु जूसा थप स्यंके मबिइत थुगु हे दँनिसें ‘स्वस्थ जलास्ये – स्वस्थ येँ देय्’ ज्याझ्वः अन्तर्गत ३२ गू वडाय् प्रारम्भिक परीक्षणया सेवा न्ह्यायेधुंकूगु मेयर शाक्यं जानकारी ब्यूगु दु ।

महानगरं सेवा संचालनया नितिं माःगु भौतिक पूर्वाधार, च्यागः हेमोडायलासिस मेसिन, छगः रिप्रोसेसिङ मेसिन, लः शुद्धीकरण प्लान्ट व मेमेगु मेडिकल उपकरणत जडान यायेत अस्पतालयात ३ करोड तका दां अनुदान उपलब्ध याकूगु दु ।

थ्व सम्बन्धी सहकार्यया नितिं महानगरपालिका व अस्पतालदथुइ न्यादँया नितिं २०७६ पुस २ गते हे सम्झौता जूगु खः । सम्झौता कथं जडान याःगु च्यागः हेमोडायलासिस मेसिनं वाःपतिं निगू सिफ्टय् सेवा संचालन यायेफइ ।

तत्कालया नितिं ४८ म्ह ल्वगियात वाःया निक्वःतक सेवा बिइफइगु अस्पतालया प्रमुख सहायक रथी डा. अरुण शर्मां जानकारी ब्यूगु दु ।

थ्व सेवा विपन्न व सेरोनेगेटिभ दीर्घ चरणया जलास्येँ ल्वगि, क्रोनिक किड्नी डिजिज स्टेज फाइभ थ्यनेधुंकूपिनिगु नितिं जक खः । थ्व सेवा कायेगु नितिं ल्वगिं महानगरपालिकाया सिफारिस कायेमाःगु जानकारी ब्यूगु दु ।

आः देय् न्यंकंया ६५ गू अस्पतालय् चालू जुयाच्वंगु ४९८ गः डायलासिस मेसिनपाखें ३,५१६ म्ह विपन्न वर्गया ल्वगिपिन्त निःशुल्क हेमोडायलासिस सेवा बियाच्वंगु तथ्यांक दु ।

निःशुल्क डायलासिस यायेबलय् राज्यं प्रति ल्वगि दँय् २ लख ६० हजार तका दां खर्च ब्यहोरे यानाः वयाच्वंगु दु । नेपालय् दँय् दसं २ हजार ६०० म्ह जलास्येँया न्हूपिं ल्वगिपिं थप जुयाच्वंगु सरकारी तथ्यांक दु ।

Categorized in स्थानिय-समाज