Header Nepal rastra bank Adv

सुविधा भोगी जनप्रतिनिधिपिन्सं जनताया दैनिक गुजाराया सवालय् गुबले चिउताः कायेगु ?

नेवा: अनलाइन न्युज | २०७९ श्रावण ३, मंगलबार १२:१६:३९

–रीदेन महर्जन

देय् न्यंक जुगु स्थानीय तह चुनावय् जनताया सेवा याये धकाः चुनावय् दनाः अत्याधिक बहुमतं चुनावय् त्याकादिइपिं मेयर, उपमेयर अले वडा अध्यक्ष व वडा सदस्य जुयादीपिं लिसें सरकार हाके यानाच्वंपिं सांसद, मन्त्री जुयादीपिन्सं थःपिन्सं गथे सेवा सुविधा छ्यला च्वंथें नेपाः देय्या उत्थान अले जनताया जीवनस्तर थकायेगु ज्याय् पलाः न्ह्याकूगु खासै चिउताः तःगु खनेमदु ।

देसय् वालय् निक्वःतक मंहगीया धलः जक पिकायेगु याइ तर जनताया दैनिक जीवनलिसें स्वानाच्वंगु मंहगी लगायत अले विकास निर्माण, लजगाःया  समस्या ज्यंकेगु सवालय् सरकार न्ह्याबलें सुम्क हे च्वनाच्वंगु दु ।

आइतवाः अन्तर्राष्ट्रिय बजारय् पेट्रोलियम पदार्थया भाः कुहाँ वःगु हुनिं भारतपाखें न्हूगु धलः नेपाल आयल निगमयात छ्वया हःसां नं नं पेट्रोलियम पदार्थया भाः क्वकायेगु सवालय् आःतक्कं सरकार पक्ष पेट्रोल, डिजेल इन्धन क्वकायेगु खँय् आःतक्क उजं तकं  मब्यूनि । नेपालय् जक छाय् जुइ न्ह्याबलें इन्धनया भाः अप्वल धाःसा कुहाँ वनिगु म्हो जक जुइ ? बरु म्वाःमदुगु त्वहः मदुगु त्वहः चिनाः अप्वयेकेगु जक स्वइगु धयागु थौंवया सर्वसाधारणया नितिं अजू चाइगु विषय जूगु दु ।

देसय् न्हियान्हिथं महंगी सर्गतय् थिइधुंकूसां नं सुं हे छम्ह नेतां जिमिगु सेवा क्वपालाः सर्वसाधारण अले गरिब, दिनदुःखी जनतापिनिगु सेवाय् जीवन फुकेमा धकाः  सु. छम्ह नेतां न्वँवायेगु हिम्मत याःगु खनेमदु  । छाय् जक झी नेतापिनिगु थुज्वःगु पहः कुर्सी थ्यनकि जनताया गुण लोमंकाः थः जक सर्वेसर्वा तायेकी ? अथे छाय् जुइ  नेपाःया नेतापिं ?   

विदेशय् सरकार हिलासु जुइ, स्थानीय सरकार नं हिलासु जुगु कथं इमिसं इमिगु देय् नं  ब्वलंका क्यनी, तर झीगु देसय् धाःसा न्ह्याबलें अःखः जक ज्या जुइ ।  न्ह्याबलें चुनाव जुइ अले महंगी अप्वइगु, सरकारी कमर्चारीपिनिगु जक तबल थकायेगु ज्या याइ । सर्वसाधारणया जीवनस्तर थकायेगु ज्या धाःसा गुबलें नं याइमखु ।  देसय् न्ह्यागु हे पार्टीया सरकार वःसां नं, न्यादँय् छक्वः  स्थानीय सरकार हिलासु जूसां नं नेतापिं अले जनप्रतिनिधिया ख्वाः जक हिल तर गरिब जनताया अले देसय् दुगु आपालं—आपालं समस्या ज्यंकेत धाःसा ताः लाकेमफुनि ।

झीगु नेवाः समाजया छगू धापू कथं ख्वाः स्वयाः बौ तयेमाः अथेहे हरेक पार्टीया नेता अले कार्यकर्तापिन्सं ईकथं बांलाक्क सुथांलाक्क पलाः छिइमफया थथे जूगुला मखुला ? धयागु न्ह्यसः चिं ब्वलेनीगु स्वाभाविक हे खः ।  थौं वया देसय् सुशासन कायम यायेत ताःमलाबले नेता अले जनप्रतिनिधिपिनिगु राक्षसी दानवी पहलं यानाः जनतातय्गु जीवन झःझः देसय् तुं नर्कथें जीवन हनेमालाच्वंगु जूसां नं सुं हे छम्ह नेतां जनताया जनजीविकाया सवालय् न्वँवाःगु मदुनि ।

राजनैतिक ख्यलय्  गुलि नातावाद अले कृपावाद,  परिवारवाद हावी जुइ उगु देँय् तहसनहसय् थ्यनीगु दसू जूगु दु श्रींलका ।  श्रीलंकाय् आर्थिक संकटया हुनिं सरकारया गलत नीतिया हुनिं देय् गालय् कुतुंवन । अनया जनतापिंसं नराकीय जीवन हनेत बाध्य जूबले अनया जनतापिन्सं राष्ट्रपति, प्रधानमन्त्री अले नेतापिन्त छेँय् वना लितुमातुलिनाः कसाः यात । बाध्य जुया अनया राष्ट्रपतिं सरकार त्वःताः मेगु देसय् शरण कायेत बाध्य जुल ।

थुकिं छु स्पष्ट जूगु दु धाःसा जनतापिनिगु दुःख पीर मर्का थुइकेगु कुतः मयाइपिं नेतापिन्सं देसय् शासन यायेगु अधिकार नं मदु  धयागु खँ स्पष्ट जूगु दु । तर  नेपाःया नेतापिन्सं थुज्वःगु खँ गुबले थुइकेगु खः ? आः नं लाःनि नेपाःया नेतापिन्सं जनताया दुःखय् सुखय् साथ बिइमाःगु सवालय् दनेमाल अले थःथःगु प्वाः जायेकेगु स्वार्थी मानसिकता त्वःताः नेपाःमां अले जनताया दुःखसुखय् साथ बिया जनताया जीवनस्तर भिंकेत थःपिनिगु बानी भिंकाः भिंगु ज्या यानाः क्यनेगु खँय् दन धाःसा न्ह्याबलें जनताया लोकप्रिय जुयाच्वने फइ, तर झी नेता अले जनप्रतिनिधिपिन्सं धाःसा खँ थुइकीगु गुबले ?

Categorized in बिचा: