1142 nhoo dan adv

सुर्खेतय् स्कूल बन्द यानाः कांग्रेसया चुनाव, माओवादी केन्द्रपाखें विरोध

नेवा: अनलाइन न्युज – ललेन्द्र शाक्य | २०७८ मङ्सिर ७, मंगलबार १७:११:१३

नेपाली कांग्रेसया चुनाव याकेत सुर्खेतया पञ्चपुरी नगरपालिका ५ बावियाचौरय् च्वंगु विद्याज्योति माध्यमिक विद्यालय बन्द याःगु दु ।

स्कूलं सुचं सार्वजनिक यानाः मंगलवाः विदा ब्यूगु दु । व स्कूल प्रांगणय् कांग्रेसया १४ क्वःगु महाधिवेशन अन्तर्गत क्षेत्रीय अधिवेशनया निर्वाचन याःगु दु ।

स्कूल थःपिन्सं हे मखुसे पञ्चपुरी नगरपालिकाया मेयर उपेन्द्र थापाया निर्देशनय् बन्द याकूगु प्राचार्य कृष्ण सापकोटां धाःगु दु ।

सापकोटां धाःगु दु, ‘स्थानीय सरकार प्रमुखया निर्देशन वयेधुंकाः बाध्य जुया छन्हुया नितिं स्कूल बन्द यानागु खः ।’

प्राचार्य सापकोटां धाःगु दु, ‘जिमिसं थौं मंगलवाःया विदायात स्थानीय विदा धयागु दु । स्कूलं नं स्थानीय विदा बिइदइगु अधिकारी दु । आः मेयरसाबं हे निर्देशन बिइधुंकाः जिमिसं छु यायेगु ले ?’

उगु स्कूलय् थ्यंमथ्यं १३०० म्ह विद्यार्थी ब्वनाच्वंगु दु । स्कूल हे बन्द याकाः छगू अमुल पार्टीया चुनाव याकेगु गलत जूगु विद्यार्थी नेता जगत ढकालं धाःगु दु ।

ढकालं धाःगु दु, ‘छगू पार्टीया चुनावया नितिं स्कूल हे बन्द याकेगु सरासर गलत खः, थ्व् प्रदूषित राजनीतिया उपज खः । थुज्वःगु गतिविधि पनेमाः ।’

स्कूल शान्ति क्षेत्र राष्ट्रिय ढाँचा व कार्यान्वयन निर्देशिकाय् स्कूल हाता दुने दलगत राजनीतिक गतिविधि, आमसभा, गोष्ठी, अभिमुखीकरण, दलगत राजनीति व मेमेगु सभा सम्मेलन यायेमदइगु न्ह्यथनातःगु दु । अथेहे, दलीय राजनीति व मेमेगु स्वार्थया नितिं स्कूल बन्द यायेमदइगु न्ह्यथनातःगु दु ।

माओवादी केन्द्रया विरोध

नगरपालिकां स्थानीय विदा बियाः स्कूलय् कांग्रेसया निर्वाचन ज्याझ्वः तयेधुंकाः नेकपा माओवादी केन्द्रया पञ्चपुरी गाउँ समितिं विरोध प्वंकूगु दु ।

मंगलवाः विज्ञप्ति सार्वजनिक यानाः माओवादी केन्द्रं स्कूल बन्द यानाः छुं नं छगू पार्टीया चुनाव याकूगु लोकतान्त्रिक मूल्य मान्यता अःखः व राजनीतिक दादागिरी धाःगु दु ।

माओवादी केन्द्रपाखें सार्वजनिक याःगु विज्ञप्तिइ धयातःगु दु, ‘थ्यंमथ्यं १३०० म्ह विद्यार्थीपिनिगु प्रत्यक्ष भविष्यलिसे स्वाःगु न्हापांगु त्रैमासिक परीक्षा न्ह्यानाच्वंगु अवस्थाय् स्कूल हे बन्द याकेबियाः लोकतान्त्रिक मूल्य मान्यता व संविधानया हे धज्जी उडेयासें क्यंगु राजनीतिक दादागिरीप्रति कडा आपत्ति प्वंकाच्वना ।’

Categorized in राजनीति