विजयरत्न असंबरे

यंकी जिगु जिन्दगी बरु, 

यंकेमते थ्व देय् जिगु 

न स्वयेफु आः न ख्वयेफु 

मन्त मिखाय् ख्वबि जिगु 

नेपालय् तःभुखाय् ब्वय् धुंका जूगु तधंगु जनधन व सम्पदा क्षति जूगु खना सुया नुगः मख्वःगु दु ? सुरेन्द्र तुलाधरया नं ख्वल । सुरेन्द्र तुलाधर धइम्ह नेपाल भाषाया कला व संकिपा ख्यलय. छम्ह ज्वमदुम्ह व्यक्तित्व खः । तःभुखाय् लिपा भूखाचं कःपिनिगु नुगलय् सिचुजः ह्वलेगु तातुना चिनातःगु थ्व म्येया म्युजिक भिडियो नं दयेकल । थ्व म्येय् खँग्व च्यूंम्ह नं सुरेन्द्र तुलाधर खः । अले थुके म्युजिक भिडियो दयेकूम्ह नं वयकः हे खः । वयकलं थ्व म्ये न्हापा कविताया रुपय् जक च्वःगु जुयाच्वन । अले उगु कविता इमेज च्यानलय् प्रसारण नं जुल । प्रसारण जुइ धुंका थुकीयात संगीतकार नील शाक्यया लसय् म्येया रुप काल । थुगु म्ये तःभुखाय्यात कःघाना दयेकातःगुलिं नेपालमण्डल राहत अभियानया नं थुकियात ग्वाहालि दत । अथेहेतुं जुजु वयेर्सं याःगु ग्वाहालि कथं थ्व म्येया म्युजिक भिडियो तयार जूगु खः धका सुरेन्द्र तुलाधरं कनादिल ।

नेवाः संकिपाया ख्यलय् तसकं लोकंह्वाम्ह सुरेन्द्र तुलाधरं दयेकूगु जूगुलिं थ्व म्युजिक भिडियोप्रति आपासिनं हे आस काःगु खः अले थुकिया लिच्वः कथं थ्व छगू च्वछाय् बहगु म्युजिक भिडियो कथं पिदंगु दु । थ्व म्युजिक भिडियोया विशेषता धइगु थुके ब्वयातःगु  झीगु देय्या ऐतिहासिक व साँस्कृतिक सम्पदा प्रतिया मतिना खः ।  

  नेपालय् वि.सं. १९९०य् ब्वःगु तःभुखाय् धुंका थुकिया अभिलेख धइगु हे ब्रम्ह शम्शेरया सफू “नेपालको महाभुकम्प १९९०” छगु जक खः । तर थौंकन्हे न्हापाथें मखय् धुंकल । संचार ख्यः तब्याय् धुंकल । उकीं महाभुकम्प २०७२ या तःभुखाय्या अभिलेख हरेक माध्यमय् अले थीथी भाषाय् स्वयेफु । स्वयेदया च्वनि । अले नेपाल भाषां नंं स्वयेदया च्वनि । थ्व छगू अज्यागु हे म्युजिक भिडियो जुयाब्यूगु दु । थ्व म्येय् मोडलया रुपय् नेपाः देय्या थीथी ख्यःया थीथी व्यक्तित्व दुथ्याका तःगु दु । 

वरिष्ठ संस्कृतिविद हनेबहम्ह शताब्दी पुरुष सत्यमोहन जोशी, नेपाः देय्या नांजाःपिं हास्य कलाकारपिं मदनकृष्ण श्रेष्ठ व हरिवंश आचार्य, नेवाः न्ह्यलुवा मल्ल के. सुन्दर , ल्याय्म्ह नेवाः नेता सुजिव बज्राचार्य, नांजाम्ह कलाकार व साहित्यकार रामशेखर नकःमि, व्यवसायी निरञ्जनरत्न शाक्य, बित्त व्यवसायी व लोकंह्वाम्ह कलाकार राजेन्द्रमान शाक्य, फिल्म निर्देशक व संकिपा पत्रकार विजयरत्न असंबरे, नांजाम्ह फोटोग्राफर राजभाई सुवाल लिसें न्हापांगु नेवाः संकिपा “सिलु”या हिरो जय श्रेष्ठ व फिल्म निर्देशक व कलाकार पवन जोशी, “राजमति”या नकिं हिसिला महर्जन वहे फिल्मया छम्ह हिरो मणिराज लवट, लोकंह्वाःपिं नेवाः हिरोइन आशिष्मा नकःमि व भिन्तुना जोशी पिन्सं नं अभिनय यानातःगु दु । 

अथेहेतुं थ्व म्येया म्युजिक भिडियो दुने मिस नेवाः सरिना स्थापित व मिस नेपाल इभाना महर्जनयात नं स्वये दइसा अमरराज शर्मा, सतीश महर्जन, दीपा महर्जन व नील शाक्य थेंज्यापिं संगीत ख्यःया कलाकारत नं दुथ्याना च्वंगु दुसा रोजिना सुवाल, भोगेन्द्र मानन्धर, रुमन जोशी, सरोज बज्राचार्य लगायतया आपालं कलाकार साहित्यकार पत्रकार लगायत नेपालभाषा ख्यःया थीथी व्यक्तित्व दुथ्याना च्वंगु दु । 

छपु म्ये दुने थुलि मछि व्यक्तित्व न्ह्यंकीगु धइगु तसकं तारीफ याये बहगु खँ खः तर अथे खसां नं थुके नेपालभाषाया भजन सम्रात धका धयातःम्ह भृगुराम श्रेष्ठ अले कलाकारय् नगीना जोशी, नारायण देवी प्रधान व व्यवसायी, समाजसेवी लक्ष्मीदास मानन्धर , ल्याय्म्ह न्ह्यलुवाः नरेशवीर शाक्य थेंज्यापिं नं दुथ्याके फूगु खःसा गजब हे जुइगु खः । तर थ्व धइगु धाये बले अफु धराग्वारा तःपु धइथें ज्यागु खँ जक खः । छपु म्ये दुने गुलि व्यक्तित्व दुथ्याकल व नं छगु तधंगु हे हाथ्या स्विकार यानाः दुथ्याकूगु खः धका मधासे मगा । निर्देशकया रुपय् सुरेन्द्र तुलाधरया कुतः तारीफ मयासे मगाः तर म्ये च्वमिया रुपय् वयात उलि तारीफ याये थाय् मदु । जनकवि दुर्गालाल श्रेष्ठयात म्ये च्वका थुकथं हे म्युजिक भिडियो दयेकूगु जूसाः अझ हे बांलाइगु जुई । थ्व म्येया तारीफ याये बहगु मेगु पक्ष धइगु नील शाक्यया संगीत नं खः । थ्व म्युजिक भिडियोया क्यामेरावर्क तिलक थापा व वीरेन्द्र भट्टयाःगु खःसा सम्पादक सुनील कृष्ण ताम्रकार खः । भुखाय्यात कया मेमेगु नं नेवाः म्ये पिदना च्वंगु दु । बांबालागु नं दु । तर चर्चाय् वया च्वंगु मदु । अज्यागु म्येयायात कया नं बिस्कं हे चर्चा जुइमाःथें च्वं ।