ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

सुरजबीर बज्राचार्यं च्वयादीगु व हालादीगु न्हूगु म्ये ‘हाकुमैंचा’या म्यूजिक भिडियो पिदन

नेवा: अनलाइन न्युज – विजयरत्न | २०७८ श्रावण ६, बुधबार १३:३४:४५

थिमिया प्यासिफिक फुड ल्याण्डय् जूगु छगू ज्याझ्वःया दथुइ मध्यपुर थिमि नगरपालिकाया मेयर मदनसुन्दर श्रेष्ठया मूपाहाँसुइ सन्चारकःमि व साहित्यकार  सुरजबीर बज्राचार्यं च्वयादीगु व हालादीगु न्हूगु म्ये ‘हाकुमैंचा’या म्यूजिक भिडियो पितब्वज्या जुउगु दु । 

ज्याझ्वःया मूपाहां मेयर श्रेष्ठं नेवाः भासं सृजना जुइगु म्येया व्यावसायीकरण यायेमाःगुपाखें बः बियादीगु दु ।  म्येया म्यूजिक भिडियोय् थीथी ऐतिहासिक, सांस्कृतिक महत्वं जाःगु सम्पदाया प्रचार प्रसारय् तकं योगदान जुइगु धयादिसें नेपालभाषायात तिबः बीगु म्येया नितिं ग्वाहालि यायेत थः सदां प्रतिवद्ध जुइ धका नं मूपाहाँ मेयर श्रेष्ठं धयादिल ।  

म्येच्वमि व म्येहालामि सुरजबीर बज्राचार्यं थ्व म्ये प्यारोडी म्येया रुपय् सृजना जूगु जुसां म्यें थःगु मौलिक रुप काःगु  दु धकाः वयकलं लसता प्वंकादिल । थुगु म्येया थ्व रुपया नितिं वरिष्ठ संगीतकार जूगल डंगोलया योगदान लुमंकूसें वयकलं सुभाय् नं देछानादिल ।  

‘हाकुमैंचा’ म्यूजिक भिडियो बालमुकुण्द प्रजापतिया निर्देशनय् तयार जूगु खःसा देवेन्द्र प्रजापतिं छायाँकन व सम्पादन यानादीगु खः ।  

नेपाल सांस्कृतिक उत्थान परिषद्या पिथना थुगु म्यूजिक भिडियोय्  अनु खड्का, रमेश बल्ल व आशाराम शिल्पकारं मू भूमिका म्हितादीगु खःसा  डेरिका छन्त्याल, आरती भासिमा, अस्मिता मानन्धर, लिजा व निशा प्रजापतिं नं थुके अभिनय यानादीगु दु । दिपक बज्राचार्य व सागर वनमालां  कोरियोग्राफी यानादीगु, आशा तामाङं समाः यानादीगु थुगु म्यूजिक भिडियो महेशप्रकाश हाडाया कजिसुइ निर्माण जूगु खः ।  

ग्यानापु स्टाइल, बुदिंया भिंतुना म्ये हालाः चर्चाय् वःम्ह भाजु सुरजवीर बज्राचार्यं ‘तसकं यःम्ह’ म्येपाखें ‘दकले बांलाःम्ह म्येहालामिकथं नेपालभाषा स्टार म्यूजिक भिडियो अवार्ड’ व निभाः म्ये धेधेबल्ला कासाय् नं दकलें बांलाःम्ह म्येहालामिया सिरपाः त्याकादी धुंकूगु दु ।

Categorized in कला