nepal investment baink

सुबिआन्तो इन्डोनेसियाया राष्ट्रपतिइ त्यात

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व द्वादसी (२०८० चैत्र ८ गते) बिहिवाः

इन्डोनेसियाय् न्ह्यःया महिनाय् जूगु राष्ट्रपति निर्वाचनय् रक्षामन्त्री प्रबोवो सुबिआन्तो त्याःगु दु । सेनाय् दूगु इलय् मानवअधिकार उल्लंघनया द्वपं लाःम्ह ७२ दँया सुबिआन्तों ५८.५९ प्रतिशत मत काःगु खः ।

प्रतिद्वन्द्वी अनिस बसवेडनं २५ प्रतिशत व गन्जर प्रणोवों १६ प्रतिशत मत काःगु खः ।

निर्वाचन लिच्वः सार्वजनिक जुइधुंकाः सुबिआन्तों जनताया हितय् ज्या यायेत कडा मिहिनेत यायेगु धाःगु दु । वं धाःगु दु, ‘सुनां जिमित भोट मबिल, वय्कःपिन्सं जिमित छगू मौका बियादीगु दु । जिपिं थुज्वःपिं राष्ट्रपति व उपराष्ट्रपति जूगु साबित याये। गुगु इन्डोनेसियाया जनताया भलाईया नितिं हरसम्भव कडा मिहिनेत यायेगु जुइ ।’

अय्सां वया निम्हं प्रतिद्वन्द्वीं चुनावी लिच्वःयात चुनौती बिइगु धाःगु दु ।

इन्डोनेसियाय् २०.५ करोड मतदाता दु, थ्वहे वंगु १४ फेब्रुअरीइ जूगु निर्वाचनय् ८० प्रतिशतं मतदान याःगु खः । तर राष्ट्रपति चुनाव प्रचारया झ्वलय् वं थःगु छवि सुधारया नितिं सामाजिक संजालपाखें अतिकं मिहिनेत याःगु खः । वं प्रचारय् युवापिन्त आकर्षित यायेगु कुतः याःगु खः ।

वं वइगु अक्टोबरय् वर्तमान राष्ट्रपति जोको विडोडोया थाय् काइगु जूगु दु ।

Categorized in अन्तर्राष्ट्रिय