Header Nepal rastra bank Adv

सुनसान जुल स्वनिगःया सतक

नेवा: अनलाइन न्युज – ललेन्द्र शाक्य | २०७९ बैशाख २९, बिहिबार १५:१५:०७

शुक्रवाः बैशाख ३० गते जुइत्यंगु स्थानीय तह निर्वाचन २०७९ स मताधिकार छ्यलाबुलाया नितिं देय् न्यंकंया मतदाता थःपिन्सं ल्ययाम्ह व मालाम्ह उम्मेदवार ल्यज्या यायेत हथाय् चायाच्वंगु दु । थुकिया नितिं इपिं मतदानया तीव्र रुपं पियाच्वंगु दु ।

स्थानीय सरकारया रुपं म्हसीका दूगु स्थानीय तहया प्रत्येक न्यादँय् वइगु निर्वाचनय् मताधिकारया सदुपयोग यायेत मतदाता थःपिनिगु नांधलः दूगु थासय् केन्द्रीकृत जूगु दु ।

स्वनिगःलिसें मुलुकया मू सहरं मतदातापिं थःथःगु थासय् केन्द्रीत जुयाच्वंगु दु । ज्या विशेषं गां त्वःताः वयाच्वंपिं आपालं मतदाता गामय् लिहाँ वनेधुंकूगु दुसा थ्वसिबें न्ह्यः वनेमखंपिं मतदातापिनिगु लिहाँ वयेगु लर्को थौं नं स्वनिगःया नाकाय् अःपुक हे खनेदूगु दु ।

बुधवाः जक ८३ हजार नागरिकं येँपाखें स्वनिगः त्वःतूगु प्रहरीं जानकारी ब्यूगु दु । थ्वहे २१ निसें २ड गतेतक ५ लख ५० हजारबिसें अप्वः यात्रुपिन्सं स्वनिगः त्वःतूगु स्वनिगः ट्राफिक ज्याकुथिया प्रहरी नायव उपरीक्ष बालनरसिंह रानां जानकारी ब्यूगु दु ।

रानाया कथं थौं दुहाँ वइगु तुलनाय् पिहाँ वनीपिनिगु याः झन् हे अप्वः जूगु दु । थ्व क्रम नेपाःया आपालं तःधंगु सहरय् खनेदु । थुगुखुसिया निर्वाचनय् मतदानाया ब्यागलं उत्साह खनेदूगु दुसा मुलुक हे निर्वाचनमय जूवंगु दु । मुलुकन्यंकं छक्वलं निर्वाचन जुइत्यंगुलिं नं लकस थप उत्साहित जूगु दु ।

लिपांगु इलय् आपालं मतदाना राजनीतिक दलं व्यवस्था याःगु यातायातया साधनं गां लिहाँ वंगु दुसा गुलिखे भाडाया सवारीसाधन व नीजि गाडीइ तकं वनाच्वंगु दु ।

मत कुर्केगु दिं सरकारं सार्वजनिक विदा ब्यूगु, मेगु दिं शनिवाः लाःगु व जेठ १ गतेनिसें वालय् निन्हु शनिवाः व आइतवाः सार्वजनिक बिदा बिइगु सरकारी निर्णय कथं आइतवाः सोमवाः तकं बुद्धजयन्तीया विदा लाःगुलिं नं नागरिकपिं छुं दिंया छुट्टी कयाः हे गामय् लिहाँ वंगु दु ।

थौं बिहिवाः चान्हय् १२ ता ईनिसें सवारीसाधन संचालन यायेमदइगु जूगुलिं नं थ्वसिबें न्ह्यःः वनेमखंपिं मतदाना थौं सनिलतक लिहाँ वनेगु तरखरय् च्वनाच्वंगु दु । थुगुखुसि निर्वाचनय् १ करोड, ७७ लख ३३ हजार ७२३ म्ह मतदाता कायम जूगु दु । थौंतक १८ दँ पूवंपिं नागरिकं मतदान यायेखनीगु जूगु दु ।

Categorized in स्थानिय-समाज