नेवा: अनलाइन न्युज | २०७२ जेठ २५, सोमबार १३:३६:४४

यदि छिं सुथया ईयात व्यवस्थित यायेफत धाःसा न्हिच्छि चुस्त व दुरुस्त जुयादीफइ । थुलि जक मखु सुथयात पाय्छिकथं व्यवस्थित यातधाःसा न्हिच्छि उकथं हे वनी, गुकथं छिं चाहे जुयादी । थन कने त्यनागु स्वंगू ज्यापाखें जिन्दगीयात अझ बांलाके फइ । झासँ व स्वता ज्या छु खः झीसं सिइके ः
न्हापांगु ज्या ः अःपुगु व साधारण तयातयेगु कुतः यानादिसँ
अप्वः मनूत सुथय् यक्व ज्या याइ । मनूत सुथय् ब्यायाम, मर्निङ्ग वाक, ब्रेकफास्ट, क्लिनिङ्ग आदि फुक्क ज्या सुथय् हे क्वचायेकेगु बिचाः याइ । गन कि सुथयात अःपुक तल धाःसा सकारात्मक लिच्वः पिदनी । यक्व ज्या यानाः छुं नं जुइमखु अले न्ह्यपुइ मययेक दवाव जुइ । थुकिं बचे जुइत सुथय् यक्व ज्या यानादी मते ।

निगूगु ज्या ः छुं उज्वःगु ज्या यानादिसँ गुकिं बांलाः ताइ
धाइ सुथय् सुं यःम्ह मनूया ख्वाः खन धाःसा न्हिच्छि हे बांलाइ । ठीक वहेकथं न्हिथं सुथय् छुं थुज्वःगु ज्या यानादिसँ गुकिं लसता वइ । थुकिं छिगु दिं न्ह्यइपुसे च्वनी । थुकी मर्निङ्गवाकनिसें कयाः ब्वने, च्वये या कुकिंग नं दुथ्याके फइ । छुं बिस्कं हे ज्या यायेमाः धइगु मदु ।

स्वंगूगु ज्या ः बुलुहुँ थाकुगु ज्यापाखे न्ह्यानादिसँ
मनू जूगुलि हुनिं झी सकलें लक्ष्यपाखे न्ह्यज्यानाच्वनी । अर्थात् न्हिच्छि थुज्वःगु ज्या याये चाहे जुइ गुगु झीत तःधंगु लक्ष्यपाखे यंकी । सुथय् हे थुकिया सुरुवात यानादिसँ, तर चीधंगु व अःपुगु ज्यापाखें थाकुगु ज्यापाखे न्ह्यज्यानादिसँ । थथे यायेबलय् तःधंगु लक्ष्य हासिल यायेत थाकुइ मखु । छितः लक्ष्य प्राप्त यायेगु न्हूगु बिचाः नं वइ ।