zero media family planning adv

सुगठित म्ह दुपिं मनूत ताःआयू म्वाइ

नेवा: अनलाइन न्युज | २०७२ कार्तिक ८, आइतबार १३:५६:५८

वीडेनया विशेषज्ञपिसं २४ दँ ताःहाकःगु अध्ययन लिपा ल्याय्म्ह बलय् सुगठित म्ह दुपिं मिजंतय्गु आयू मेपिनिगु स्वयां अप्वः दइगु निष्कर्ष पिकाःगु दु । थुगु अध्ययनय् ज्या याःपिं मनूतय् निष्कर्ष दु कि सुगठित म्ह सुस्वास्थ्यया प्रतिक खः । उमिसं गुपिं ल्याय्म्हतय्गु मांसपेशीत तसकं बल्ला, उपिं कमजोर मांशपेसी दुपिं स्वयां यक्व म्वाइ । तर विशेषज्ञपिसं सुगठित म्ह दयेकेवं ताः आयू दइगु हे धकाः चाहिं मधाः ।
अध्ययनय् मांसपेशीत कमजोर जूपिं मनूत लिपा वनाः उच्च रक्तचाप व ल्ह्वंगु खनेदुगु खः, गुगु याकनं सीगुया हुनिं जुइफु । गुबले विशेषज्ञपिसं याकनं सीगुया हुनिं माल उमिसं दुग्यंक अध्ययन यात, उबले मांसपेशीतय्गु ताःआयूलिसे स्वापू दुगु खुलासा याःगु खः ।


थुगु अध्ययनय् ल्ह्वंपिं व गंसिपिं वयस्क मनूतय्गु दथुइ छगू हे कथंया लिच्वः वःगु दु । गुगु इलय् थ्व अध्ययन जुल, उकिया झ्वलय् २६,१४५ मिजंत सीगु खः । सीगुया दकलय् तःधंगु हुनिं दुर्घटनाय् लाःगु घाःपाः, आत्महत्या, क्यान्सर, नुगःया ल्वय् व हृदयाघात जूगु लूगु खःसा सीपिं मध्ये स्वब्वय् छब्व मनूत मेमेगु कारणं सीगु खः । गुकियात शोधकर्तापिसं अलग्ग हे तःगु दु ।
अध्ययनया सुरुइ मांसपेशीइ यक्व तागत दुपिं मनूतय्के नुगःया ल्वचं कइगु व थुकिं सीगु सम्भावना २५–३० प्रतिशत म्हो जूगु खनेदुगु खःसा आत्महत्या याःगु नं कम जक खनेदु । थ्व बाहेक उमिके मानसिक रोग नं ६५ प्रतिशत म्हो जक खनेदुगु खः । अध्ययनया हे झ्वलय् १५– १६ दँ य् कमजोर मनूत ६० दँ  न्ह्यः हे सीगु यक्व सम्भावना दुगु धाःगु दु ।


लण्डन स्कूल अफ हाईजीन व ट्रपिकल मेडिसिनया फर्माको एपीडीमीयोलोजी विभागया प्रोफेसर स्टीफन ईवान्सकथं थुगु शोधं ब्यायामं फाइदा जुइगु स्पष्ट दुगु तर थुकिं थ्व स्पष्ट मजूकि छि तःधिकः जुइधुंकाः ब्यायाम यानाः यक्व म्वाइ । थ्व अध्ययन धुंकाः नं मनूतय्त ब्यायाम यायेत प्रोत्साहित यायेगु धाःसा चुनौति हे जूगु वय्कःया धापू दु ।