Mohanai 2078 KTM

सुकुम्बासी व प्रहरीया ल्वापुइ बुटवलय् गोली प्रहार

नेवा: अनलाइन न्युज – ललेन्द्र शाक्य | २०७८ आश्विन २४, आइतबार १६:०१:२२

रुपन्देहीया मोतिपुर औद्योगिक क्षेत्रया जग्गाय् च्वनाच्वंपिं सुकुम्बासी पुचः व प्रहरीदथुइ ल्वापु जुयाः प्रहरीं गोली प्रहार याःगु दु ।

प्रहरीं गोली प्रहार याःबलय् सुं सुं घाःपाः जूगु दु । रुपन्देहीया प्रमुख जिल्ला अधिकारी ऋषिराज तिवारीं प्रहरीपाखें गोली प्रहार जूगु पुष्टि याःगु दु । औद्योगिक क्षेत्रया जग्गाय् अस्थायी रुपं च्वनाच्वंपिं सुकुम्बासी पुचः व प्रहरीदथुइ ल्वापु जुयाः प्रहरीं गोली चलेयाःगु प्रमुख जिल्ला अधिकारी तिवारीं धाःगु दु । घटनाया विस्तृत धलः वयेल्यंदनीगु नं प्रजिअ तिवारीं धाःगु दु ।

प्रशासनं अतिक्रमण जूगु औद्योगिक क्षेत्रया जग्गापाखें स्थानीययात चिइकेत स्वःबलय् तनाबया स्थिति ब्वलंगु खः । प्रहरीं चान्हय् १ ता इलय् छेँ घेराऊ यानाः स्थानीय ३१ दँया हिमाल रानायात गिरफ्तार यायेधुंकाः स्थानीय आक्रोशित जूगु खः ।

बुटवल वडा ल्याः १७ व १८ य् लाःगु औद्योगिक क्षेत्रया खुसि उकास क्षेत्रय् वंगु वाःनिसें तःधंगु ल्याखय् अस्थायी टहरा दयेकाः जग्गा अतिक्रमण जूगु खः । प्रशासनं स्वन्हु न्ह्यःनिसें बहनी टहरात थुनेगु ज्या यानाः वयाच्वंगु दु । तर, अथे याःसां नं अतिक्रमित जग्गापाखें स्थानीय लिमच्यूबलये प्रहरीं आइतवाः बल प्रयोग याःगु खः ।

जग्गाय् वंगु चैत्रय् औद्योगिक क्षेत्रया शिलान्यास याःबलय् स्थानीयं विरोध यासें ढुंगामुढा यायेधुंकाः ज्याझ्वः द्यूगु खः ।

Categorized in स्थानिय-समाज