nepal investment baink

सुकुम्बासीतसें यात येँ महानगरपालिका ज्याकू पिने प्रदर्शन

नेवा: अनलाइन न्युज – ललेन्द्र शाक्य | २०७९ मङ्सिर १३, मंगलबार १२:२१:२५

येँया थापाथलीइ च्वंगु बागमती खुसि सिथय् च्वनाच्वंगु सुकुम्बासी बस्तीया बासिन्दापिन्सं येँ महानगरपालिकाया ज्याकू न्ह्यःने प्रदर्शन याःगु दु । थःपिनिगु उचित व्यवस्थापन मयाःसे चिइकेत्यंगु विरोधय् इमिसं महानगरया ज्याकू न्ह्यःने प्रदर्शन याःगु खः ।

एकीकृत बागमती सभ्यता विकास समितिं अतिक्रमित बस्ती खाली यायेत महानगरयात इनाप यायेधुंकाः महानगरया पुचः सोमवाः बस्तीइ थ्यंकूगु खः । उगु झ्वलय् निगू पक्षदथुइ घमासान ल्वापु जुयाः स्थिति तनावपूर्ण जूगु खः । ल्वापुइ नगर प्रहरी प्रमुखलिसें ३६ म्ह घाःपाः जूगु खः ।

येँ महानगर प्रहरी प्रमुख राजु पाण्डेया कथं मंगलवाः सुथय् सुकुम्बासी बस्तीया स्वसःम्हसिबें अप्वः सुकुम्बासीपिन्सं महानगर घेरेयायेत वःगु खः । थापाथलीपाखें नारा जुलुस यानाः वःपिं इमिसं महानगरविरुद्ध छुं ई नारा थ्वयेकाः हाकनं थापाथलीइ हे लिहाँ वंगु खः । इमिसं थापाथलीया सुकुम्बासी बस्ती दुहाँ वनेगु मू लँपुइ टायर च्याकाः प्रदर्शन यानाच्वंगु दु ।

एकीकृत बागमत िसभ्यता विकास समितिं मंसीर ४ गतेतक लिपांगु म्याद तयाः खुसि सिथया अतिक्रमित बस्ती खाली यायेत सुचं पिकाःगु खः । वहे कथं बस्ती खाली यायेत महानगर पुचः सोमवाः थ्यनेखतं थापाथली लागा तनावग्रस्त जूगु खः ।

एकीकृत बागमती सभ्यता विकास समितिं चुनावया दिनय् हे लिपांगु म्याद तयाः बस्ती खाली यायेत सुचं सार्वजनिक याःगु खः । उगु लागाय् थ्यंमथ्यं न्याद्वःम्ह सुकुम्बासीया जनसंख्या दूगु अनुमान याःगु दु ।

एकीकृत बागमती सभ्यता विकास समितिया सुपरभाइजर सागर कटुवालं सुकुम्बासी लागाय् थ्यंमथ्यं १३६ छेँखा टहरा चिइकेमाःगु अवस्था दूगु धाःगु दु । समितिं खुसि सिथय् च्वंगु सार्वजनिक भवन, किरियापुत्री भवन, साईसेवा केन्द्रया भवनत महानगरया ग्वाहालिपाखें थुनेधुंकूगु दु ।

उगु सार्वजनिक भवन थुनाः बस्ती चिइकेगु सुचं जारी यायेधुंकाः सुकुम्बासी बस्तीया बासिन्दातसें फिब्वख्यः माइती मण्डलाय् विरोध सभा तकं याःगु खः ।

Categorized in स्थानिय-समाज