dudha jayanti 2568

सुकुन्दा साहित्य पाःलाःपाखें महाकवि गिरिजाप्रसाद जोशीया ८६ क्वःगु बुदिं हन

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व चौथी (२०८० चैत्र ३० गते) शुक्रवाः

येँया रत्न राज्यलक्ष्मी क्याम्पसया सुकुन्दा साहित्य पाःलाःया ग्वसालय् निक्वःगुखुसि महाकवि गिरिजाप्रसाद जोशीया ८६ क्वःगु बुदिं हंगु दु ।

उगु पाःलाःपाखें वंगु दँय् नं महाकवि गिरिजाप्रसाद जोशीको ८५ क्वःगु बुदिं हंगु खः ।

ज्याझ्वसं नकितिनि जक मदुम्ह  महाकवि गिरिजाप्रसाद जोशीया  शिष्यलिसें  नेपाःया  दकले न्हापांम्ह  केमिकल इन्जिनीयर व साहित्यकार राजदास श्रेष्ठ, गुम्हेसिनं तन मन धनं नेपालभाषाया  साहित्यिक ख्यलय् बियादीगु  योगदानयात कयाः लुमंकूसें छगू मिनेट  मौनधारण च्वनाः ज्याझ्वः न्ह्याःगु खः ।

सुकुन्दा साहित्य पाःलाःया इतिहासया हे दकले न्हापांगुखुसि अनलाइन जुमपाखें जुगु उगु ज्याझ्वःया मूपाहाँ  वर्ल्ड नेवा अर्गनाइजेशनका संस्थापक अध्यक्ष डा. बालगोपाल श्रेष्ठं महाकवि गिरिजाप्रसाद जोशीया  योगदानबारे न्ह्यब्वसें थः भाग्योदय मा.वि. आखः ब्वनाबले महाकवि गिरिजाप्रसाद जोशी स्यनामि जुया  अंग्रेजी व नेपालभाषा विषय आखः ब्वंकूगु लिसें  ब्वनेकुथि व सक्व देय्या थीथी  साहित्यिक ज्याझ्वःलिसें ब्वनामिपिन्त थीथी हस्तलिखित पत्रिका पितब्वयेत  महाकविया हे उपस्थितिइ सक्वय् भाषा साहित्य मुँज्या खलः नीस्वंगु व उगु संस्थाया न्हापांम्ह नायो जुया थीथी साहित्यिक ज्याझ्वः, सांस्कृतिक ज्याझ्वः यानादीगु  महाकवि गिरिजाप्रसाद जोशीं लय् चिनादीगु रचना व संगीत बियादीगु जनताया म्ये हालेगुथ जाःगु ज्या यानादीगु लुमंकादिल ।

महाकाव्यनिसें कया आपालं कृतित त्वःतादीम्ह महाकवि गिरिजाप्रसाद जोशी ४९ दँया बैसय् मदुगु जूसां नं नेपालभाषा ख्यलय् आपालं साहित्यकारपिन्त  प्रेरणाया श्रोत जुयादीगु खँ कनादिल ।  

मूपाहाँ श्रेष्ठं महाकविया हे प्रेरणां थःम्ह नं  साहित्यिक सृजनाय्  यानागु व मातृभाषाया सेवाय् थौंतक्क पलाः तयाच्वनेफुगु धापू तयादिल ।

मूपाहाँ श्रेष्ठं नकतिनि मदुम्ह भाषासेवी राजदास श्रेष्ठ मदुगुलिं बिचाः हायेकूसें नेपालभाषा ख्यलय् तःधंगु क्षति जूगु धयादिल ।

ज्याझ्वलय् रुपा शाही, रामोश श्रेष्ठ, सुकुन्दा साहित्य पाःलाः छञ्याजे संयाजेक रिदेन महर्जन अले नायो प्रशान्त डंगोलं थःथःगु साहित्यिक सृजना न्ह्यब्वयादीगु खः ।

ज्याझ्वलय् सुकुन्दा साहित्य पाःलाः छञ्याजे लिसें ज्याझ्वःया संयाजेक रिदेन महर्जनं वइगु दिनय् छसिकथं नेपालभाषा साहित्यिक ख्यलय् ज्वःमदुगु योगदान बियादीपिं महान् व्यक्तित्वपिन्त कदर यासें थीथी साहित्यिक ज्याझ्वः यायेगु बचं प्वंकादीगु खः ।

अथेहे सुकुन्दा साहित्य पाःलाः नायो प्रशान्त डंगोलं थुगु ज्याझ्वः ताःलाकेत ग्वाहालि यानादीपिन्त सुभाय् देछानादीगु खः ।

– रिदेन महर्जन

 

Categorized in नेवाः