1142 nhoo dan adv

सी धुंकूम्ह मनू गामय् वधेधुंकाः...!!!

२०७२ पौष २८, मंगलबार ०९:१५:४५

घटना पथरी मोरङया खः, वंगु जेठय् सीत धकाः दाहसंस्कार यायेधुंकूम्ह पथरी, शनिश्चरेया भूपाल अधिकारी म्वानाच्वंगु अवस्थाय् गामय् दुहाँ वःबलय् गामय् च्वंपिं अजू चाःगु दु ।

इलाका प्रहरी ज्याकू पथरीया प्रहरी निरीक्षक रमेश बस्नेतया कथं च्याला न्ह्यः पथरी शनिश्चरे–१ य् च्वंगु शान्ति सामुदायिक वनय् लुयावःगु सीम्हया कंकाल (क्वँय्) व वसः १८ दँ दुम्ह भूपाल अधिकारीया जूगु छेँजःपिन्सं पुष्टि यायेधुंकाः प्रहरीं सीगु पुष्टि यानाः दाहसंस्कार याकेब्यूगु खः ।

भूपाल अधिकारीया छेँजःपिन्सं प्रहरीइ ब्यूगु जाहेरीया आधारय् प्रहरीं भूपाल सीधुंकूगु पुष्टि यानाः अन्त्येष्टि याःगु च्याला लिपा म्हिगः सोमवाः शनिश्चे–५ या भूपाल अधिकारी म्वाःम्ह जुयाः पथरी, शनिश्चरे वःगु दु । सुस्त मनस्थितिया भूपाल थ्वसिबें न्ह्यः भारत थ्यंगु सीदूगु दु ।

पथरीया प्रहरी निरीक्षक बस्नेतया कथं ट्याक्टरय् मजदुरीया ज्या यानाः वयाच्वंम्ह भूपाल जेठ १५ निसें २० गतेया दथुइ गायब जूगु खः । प्रहरीया ह आग्रहस अधिकारी छेँजःपिन्सं उगु कंकाल ल्हाकूगु खः । भूपाल ट्याक्टरं कुतुं वनाः सीगु द्वपं भूपालया छेँजःपिन्सं बिइधुंकाः प्रहरीं उगु हे इलय् भूपालं ज्या याइगु ट्याक्टरया चालकयात ज्वनाः कर्तव्य ज्यान मुद्दा दर्ता यानाः कारवाहीया प्रक्रिया न्ह्यःने यंकूगु खः ।

भूपाल म्वानाच्वंगु अवस्थाय् लुयाः वयेधुंकाः उगु कंकाल सुयागु खः धैगु विषयस मेगु अनुसन्धान यायेमाःगु विषय जूगु प्रहरी निरीक्षक बस्नेतया धापू खः ।

सीधुंकूम्ह काय् म्वाःम्ह जुयाः लिहाँ वयेधुंकाः छेँजः दुने लसता ब्वलंगु दु । तर, किरिया यायेधुंकूम्ह मनूयात छेँय् तयेमज्यूगु धासें गामय् च्वंपिन्सं विरोध यायेधुंकाः काय्म्ह भूपालयात छेँय् तयेत मछिनाच्वंगु छेँजःपिन्सं धाःगु दु ।

भूपाल अधिकारी लुयावःगु सीखतं हे गांया मनूतसें छेँय् तयेमज्यूगु धासें दबाब बियाच्वंगु भूपालया मां मनमाया अधिकारीं धाःगु दु । मनमायां धयादी, ‘सुनां छु धाइ, व न्यनेमखु, जि काय् जिं छेँय् हे यंकाः तये ।’

भूपाल अधिकारीयात आः इलाका प्रहरी ज्याकू पथरी हयाः तयातःगु दु ।