zero media family planning adv

सीपिनिगु ल्याः अप्वयेधुंकाः इटालीइ ...नो मास्क...जुलुस

नेवा: अनलाइन न्युज – ललेन्द्र शाक्य | २०७७ भाद्र २२, सोमबार १०:५५:४०

इटालीया राजधानी रोमय् मास्क छ्यलाबुलाया विरुद्ध प्रदर्शन जूगु दु । सरकारं कोरोना भाइरस ब्वलंके मबिइत मास्क छ्यलाबुलायात अनिवार्य याःसां नं मृत्युदर अप्वयेधुंकाः मास्कया छ्यलाबुलाविरुद्ध प्रदर्शन जूगु अन्तर्राष्ट्रिय संचारमाध्यमं जानकारी ब्यूगु दु ।

स्वास्थ्यमन्त्रीं शनिवाः १६ म्ह कोरोना संक्रमितपिं सीगु जानकारी बिइधुंकाः प्रदर्शन जूगु खः । ताःईतक मृत्युदर म्हो जूसां नं शनिवाः छन्हुं हे १६ म्ह मनूत सीगु खः । अथेहे, थप १,६९५ म्ह संक्रमित लुयावःगु खः ।

थ्वसिबें न्ह्यः शुक्रवाः ११ म्ह संक्रमित सीगु खःसा १,७३२ म्ह न्हूपिं संक्रमित लुयावःगु खः । थ्वहे झ्वलय् बिहिवाः १० म्ह संक्रमितपिं सीगु खः ।

वंगु डिसेम्बरनिसें हलिंन्यंकं ब्वलंगु भाइरसपाखें आःतक इटालीइ २ लख ७६ हजार ३३८ म्ह संक्रमित जुइधुंकूगु दु ।

जोन्स हप्किन्स विश्वविद्यालयया कथं संक्रमितमध्ये २ लख ९ हजार ६१० म्ह वासः यानाः लंकाः डिस्चार्ज जुइधुंकूगु दु ।

अथेहे, ३५ हजार ५३४ म्ह मनूत सीधुंकूगु जानकारी ब्यूगु दु ।

(थौं सोमवाः अन्नपूर्ण न्हिपौ दुने पिदंगु बुखँ )

Categorized in पत्रपत्रिका