zero media family planning adv

सिलाचःह्रे–शिवरात्री

नेवाःतय्सं हनाः वयाच्वंगु नखःचखः मध्येय् छुं छुं नखःचखः बहनी वा सन्ध्याकाः इलय् द्यःद्यःपिन्त पूजा यानाः नखः हनेगु यानाः वयाच्वंगु 

गथे पाहाँचःह्रे हनीबलय् सन्ध्याकाःइलय् वा बहनी तिनि लुकुमाद्यः पूजा यानाः भ्वय् नयेगु याइगु खः । चथाः हनीबलय् नं सर्गतय् चन्द्रमा लुइधुंकाः पूजा यानाः नखः हनेगु याइगु खः । अथेतुं लक्ष्मीपूजा व म्हपूजा नं बहनी हे जक यायेगु चलन दु । थथे बहनीया महत्व दूगु नखःचखः मध्येय् सिलाचःह्रे नं छगू खः ।

सिल्ला कृष्ण चतुर्दशीकुन्हुया दिंयात सिलाचःह्रे कथं हनेगु चलन दु । सिलाचःह्रेयात शिवरात्री, महाशिवरात्री धकाः नं धायेगु याः । थ्वकुन्हु विशेष यानाः महाद्यः पूजा यानाः महाद्यःया नामय् अबसं च्वनाः हनीगु खः ।
सिल्ला कृष्ण चतुर्दशी अर्थात् फाल्गुन कृष्ण चतुर्दशीकुन्हु महाद्यःया उत्पत्ति जूगु दिं धकाः नं धायेगु याः ।

अथेतुं थ्वकुन्हु मनूया आत्मा मोक्ष जुइगु वा भिंगु मन जुइगु दिं धकाः नं धायेगु याः । थ्वया बारे छपू परम्परागत चिबाखं नं दु ।

छन्हु छम्ह शिकारी न्हिच्छितक जंगलय् चाःचाः हिलं नं छम्हे शिकार याये मखं । सन्ध्याकाःइलय् वयाः छथाय् बेलपत्रमाया क्वय् वयाः झाःसु लन । उगु बेलपत्रमाया क्वसं लः मुनाच्वंगु छगू थाय् नं दूगु जुयाच्वन । उगु लः दूगु थासय् हे बेलपत्रमाया हलं त्वपुयाच्वंगु छगू महाद्यःया मूर्ति दूगु जुयाच्वन ।

शिकार याये मखंम्ह शिकारी बेलपत्रमाया क्वय् झाःसु ललं छपाः छपाः बेलपत्रया हः थ्वयाः कुतुका च्वंगु जुयाच्वन । उगु कुतुंवःगु बेलपत्रया हः महाद्यःया प्रतिमाय् लानाच्वंगु जुयाच्वन । अज्याःगु इलय् छम्ह मिसाम्ह चल्ला लः त्वने धकाः उगु थासय् वःबलय् शिकारीं स्यायेत्यन । थःत स्यायेत्यंगु खनाः मिसाम्ह चल्लां जितः आः स्याये मतेनि, जिमि मचातय्त छक्वः नसा नकाः लिहां वये अले जक शिकार या धकाः धाल ।

थ्व खँ न्यनाः शिकारीं मिसाम्ह चल्लायात त्वःता छ्वत । अनं लिपा नं उगु थासय् आपालं पशुपंछीत वल । दक्वसिनं छगू छगू त्वहः तल वन । दक्वसितं नं शिकारीं त्वःताछ्वल । लिपा मिसाम्ह चल्लांनिसें दक्व झंगः पंछीतय् थःथःगु ज्या सिधयेकाः शिकारीयाथाय् थःत शिकार या धकाः बचं पूरा याः वल । तर शिकारीया धाःसा सुं नं पशुपंछीयात शिकार यायेमास्ति मवल । उलि जक मखु हिंसा हे याये मास्ति मवल । थथे जूगुया मू हुनि थ्व दिं धयागु फाल्गुण सिल्ला चतुर्दशीकुन्हु जूगु जुयाच्वन नापं शिकारीं बेलपत्रया हः कुतुकुगु महाद्यःया प्रतिमाय् लानाच्वन । थुकथं थ्व दिनय् महाद्यःयात पूजा यात यायेवं हिंस्रक मन हे नं अहिंसा जुइगु वा भिंगु मन जुइगु जुयाच्वन । अथे मन भिनावःगु जूगुलिं महाद्यःया दूत वयाः शिकारीयात शिवलोकय् यंकाः हिंस्रकपाखें मोक्ष प्राप्त याकल ।

अथे मोक्ष प्राप्त जुइगु जूगुलिं हे थ्वकुन्हु मनूतय्सं महाद्यःयात पूजा यानाः महाद्यःया नामय् सुचिनिचि यानाः म्हः ल्हुयाः नीगु वसः पुनाः अबसं च्वनाः मृत्यु लिपा हानं छुं हे जन्म कायेम्वाःलेमा शिवलोकय् वने खनेमा धकाः विश्वास याइगु खः । महाद्यः धयाम्ह हे शक्ति खः । शिव धयाम्ह हे पशुपति खः ।

संस्कृतिविद् शताब्दी पुरुष सत्यमोहन जोशीजुया धापू कथं ‘पशुपति’ या अर्थ हे ‘आत्मायात मोक्ष बीम्ह मोक्षदायक खः ।’

(प्रा.डा. चुन्दा बज्राचार्य च्वयादीगु सफू ‘नेवाः तजिलजिइ नखःचख’ सफूपाखें संक्षिप्त रुपं ल्ह्यया ।)