nepal investment baink

सिरियाय् हवाई आक्रमण : इरानया सैन्य कमाण्डरलिसें ७ म्ह सित

नेवा: अनलाइन न्युज – ललेन्द्र शाक्य | ने.सं. ११४४ चिल्लागा अस्तमि (२०८० चैत्र २० गते) मंगलवाः

सिरियाया राजधानी दमास्कसय् च्वंगु इरानया वाणिज्य दूतावासय् आक्रमण जुयाः सैन्य कमाण्डरलिसें ७ म्ह सीगु दु ।

सीपिं इरानया कुद्सफोर्सया कमाण्डर ब्रिगेडियर जनरल मोहम्मद रेजा जाहेदी, डेपुडी ब्रिगेडिएर जनरल मोहम्मद हादी हाजी रहीमी लिसेंया जूगु बीबीसीं जानकारी ब्यूगु दु । मोहम्मद रेजा जाहेदी इरानया शीर्ष कमारण्डरमध्येया छम्ह खः ।

सोमवाः जूगु उु आक्रमण सुनां याःगु खः धैगु सीमदुनि । इरान व इजरालय दथुइ थुगु कथंया हत्याया इतिहास जूसां नं इजरायलपाखें आःतक छुं प्रतिक्रिया सार्वजनिक जूगु मदुनि । इजरायलया सेनां विदेशी मिडियाया रिपोर्टय् छुं टिप्पणी मयायेगु जानकारी ब्यूगु बीबीसीं न्ह्यथंगु दु ।

सिरियाया रक्षा मन्त्रालयं आक्रमण इजरायलं याःगु जिकीर याःगु दु । इजरायली एयरक्राफ्टं गोलान हाइट्सपाखें इरानया वाणिज्य दूतावासय् आक्रमण याःगु जानकारी ब्यूगु दु ।

सिरियाय् इरानया वाणिज्य दूतावास पश्चिमी मेजाय् च्वंगु छगू हाईवेस दु । सिरियां इजरालयया छुं मिसाइलयात कुतकूगु व गुलिं पनेमफूगु नं जानकारी ब्यूगु दु ।

थुगु आक्रमण स्थानीय ई कथं सोमवाः सनिलया थ्यंमथ्यं ५ ता ईपाखें जूगु खः । आक्रमण थुलि भयानक जूगु खः कि तःजाःगु भवन नं ध्वस्त जूगु दु । इरान व सिरिया निगुलिं सरकारं आक्रमणया निन्दा याःगु दु ।

इरानी राजदूत होसैन अकबरीं इजरायलया एफ–३५ लडाकू जेटविमानं आक्रमण याःगु जानकारी ब्यूगु दु । वं सुरुइ इरानया सरकारी मिडियायात न्याम्ह निसें न्हयम्ह सीगु जूुइफूगु धाःगु खः ।

वधुंकाः रिभोल्युशनरी गार्डसं विज्ञप्ति सार्वजनिक यासें मोहम्मद रेजा जाहेदी लिसें न्हयम्ह अधिकारीया ज्यान वंगु पुष्टि याःगु खः । जाहेदी दकले अप्वःहाई प्रोफाइल इरानी कमाण्डरया रुपं म्हस्यू ।

Categorized in अन्तर्राष्ट्रिय