ad prabhu

सिराहाय् राहतया खँय् ल्वापु, प्यम्ह घाःपाः, प्रहरीं हवाई फायर

नेवा: अनलाइन न्युज – ललेन्द्र शाक्य | २०७७ बैशाख २२, सोमबार १७:२६:१०

लकडाउनया मारय् लाःपिं विपन्न, मजदुर छेँजःपिन्त राहत इनेगु झ्वलय् सिरहा नगरपालिका ७ फूलबडियाय् थौं सोमवा: स्थानीयबासी व प्रहरीदथुइ ल्वापु जुयाः प्यम्ह मनू घाःपाः जूगु दु ।

राहत कायेगु धलखय् धनी व्यक्तिपिनिगु नां दुथ्याकूगु धासें स्थानीयबासीं राहत इनीपिं टोलीयात अप्पा–ल्ह्वंतं क्ययेके धुंकाः प्रहरी व स्थानीयबासी दथुइ ल्वापु जूगु खः ।

ल्वापुया झ्वलय् प्रहरीं भीडयात तितरवितर यायेत ९ राउण्ड हवाई फायर व प्यंगू राउण्ड टियरग्यास प्रहार याःगु जिल्ला प्रहरी ज्याकुथि सिरहाया प्रवक्ता प्रहरी नायव उपरीक्षक विनोद घिमिरें जानकारी ब्यूगु दु ।

ल्वापुया झ्वलय् प्यम्ह स्थानीयबासी सामान्य घाःपाः जूगु व इमिगु स्थानीय क्लिनिकय् वासः जुयाच्वंगु धाःगु दु ।

मिर्चैया नगरपालिका वडा ल्याः ७ या वडाध्यक्ष रामकुमार यादवं राहत काइपिनिगु धलखय् थः आसेपासेपिनिगु नां जक दुथ्याकाः राहत इनेगु ज्या याःगुलिं विरोधय् क्वाहाँ वःगु स्थानीयबासी रामेश्वर यादवं धाःगु दु ।

वडाध्यक्ष यादवं मनोमानी ढंगं विपन्नपिनिगु नां धलः मुंकाः राहत इनेगु ज्या याःगु विरुद्धय् स्थानीयबासी क्वाहाँ वयेधुंकाः प्रहरी व स्थानीयबासीपिं दथुइ ल्वापु जूगु रामेश्वर यादवं जानकारी ब्यूगु दु ।

थुखे वडाध्यक्ष यादवं छुं पूर्वाग्रह मतःसे निष्पक्ष ढंगं बास्तविक विपन्न, गरिब छेँजःपिन्त राहत इनेत्यनाबलय् राजनीति रुपं विवाद ब्वलंकेत्यंगु धाःगु दु । थ्वसिबें न्ह्यः मिर्चैया नगरपालिकाया मेमेगु वडाय् नं राहत इनेगु झ्वलय् विवाद जूगु खः ।

अथेहे, सिरहाया सुखीपुर नगरपालिका २ लय् नं राहत इनेगु झ्वलय् आइतवाः ल्वापु जूगु खः । वडाध्यक्ष भुपनेश्वर यादवं राहत इनेगु धलखय् थः आसेपासेया नां जक दुथ्याकूगु धासें राहत इनेगु ज्याय् पंगः थनेत्यंबलय् ल्वापु जूगु खः ।

ल्वापुया झ्वलय् प्रहरीं लाठीचार्ज यानाः भीडयात तितरवितर याःगु खः ।

Categorized in दुर्घटना-अपराध