Mohanai 2078 KTM

सिम्रिकया मतिनाय् तन एरोन ‘मोहनी भोजय्’, मंगलवाः यूट्युब च्यानलय्

नेवा: अनलाइन न्युज – ललेन्द्र शाक्य | २०७८ आश्विन १९, मंगलबार १४:४१:२७

किपूया एरोन महर्जन नैकापया सिम्रिक श्रेष्ठया मतिनाय् ‘मोहनी भोजय्...’ पिहाँ वयेत्यंगु दु ।

थौं मंगलवाः सनिलया ५ ता इलय् Aaron Maharjan यूट्युब च्यालनय् एरोन व सिम्रिकया ‘मोहनी भोजय्...’ गुज्वःगु मतिना जूगु खः ? सकलसित कनेगु नितिं वइगु जूगु दु । एरोनं सिम्रिकलिसे जूगु मतिना थःगु हे यूट्युब च्यानल Aaron Maharjan पाखें थौं मंगलवाः सनिलया पायछि ५ ता इलय् सार्वजनिक यासें सकलसित स्वयेत इनाप यानादीगु खः ।

किपूया खेलकुद क्षेत्रया कासामि भुवन महर्जनया च्वसाय् व लसय् पिदंगु ‘मां...’ म्ये हालाः व उगु म्येया म्यूजिक भिडियोय् भन्तेया भूमिकाय् अभिनय यानाः कलाकारिता क्षेत्रय् पलाः तयादीम्ह मचा म्येहालामि कलाकार एरोन महर्जन व प्रतिभावान् मचा कलाकार सिम्रिक श्रेष्ठया बाल मनोविज्ञानं जाःगु मोहनी नखःयात कःघानाः दयेकातःगु मोहनी नखःया ‘मोहनी भोजय्...’ म्येया म्यूजिक भिडियो थौं मंगलवाः सनिलया ५ ता इलय् Aaron Maharjan यूट्युब च्यानलपाखें सार्वजनिक जुइत्यंगु खः ।

लोकंह्वाःम्ह कलाकार रुपेन श्रेष्ठ थक्वाःमिया निर्देशनय् पिदनेत्यंगु थुगु म्ये भ्यालेन्टाइन म्ये ‘ 14th february...Hello pooja ’ हालाः लोकंह्वाःम्ह म्येहालामि सगुन ताम्राकारया सलं थ्वयाच्वंगु म्ये खःसा म्येहालामि ताम्राकारं हे संगीत संयोजन यानादीगु व अञ्जना ताम्राकारया च्वसां पिज्वःगु मोहनीया लोक लसं थ्वयाच्वंगु म्ये खः, ‘मोहनी भोजय्...’ ।

हलिंन्यंकं थ्वइगु जूगुलिं थुगु म्यूजिक भिडियोय् म्येग्वःयात अंग्रेजी भासं अनुवाद यानाः अंग्रेजी सबटाइटल नं दुथ्याकातःगु दुसा थुगु म्येया अंग्रेजी अनुवाद किपूया रविन्द्र महर्जनं यानादीगु दु ।

नेपालभाषा संकिपा व म्यूजिक भिडियो ख्यलय् थःम्हं फक्व योगदान यायेगु आज्जु ज्वनाः पलाः न्ह्याकादीम्ह युवा रंगकःमि रकी महर्जन किपालुमि लिसें भिडियो सम्पादक जुयाः पिदनीगु ‘मोहनी भोजय्...’ म्येया म्यूजिक भिडियोया नितिं ईश्वरी कारंजित मेकअप आर्टिष्ट जुयादीगु दुसा रमेश पौडेल लाइट्स म्यान जुयादीगु दु ।

अथेहे, मिसा भेषभूषाया नितिं गिफ्ट नेपालया शोभा महर्जनं ग्वाहालि यानादीगु थुगु म्येया म्यूजिक भिडियोया नितिं किपूया नेवाः लहना विश्व सरसफाई अभियानया अभियन्ता राजमान मानव, किपूया हे सर्टमूभि च्वमि राज महर्जन, भुवन महर्जन, कलाकार इन्दु ज्यापुनीपिन्सं विशेष ग्वाहालि यानादीगु दु धकाः निर्देशक रुपेन श्रेष्ठ थक्वाःमिं जानकारी बियादीगु दु ।

थौं पिदनीगु मोहनी म्ये ‘मोहनी भोजय्...’ म्यूजिक भिडियोय् कलाकारपिं एरोन महर्जन व सिम्रिक श्रेष्ठया लिसें मञ्जु महर्जन व थीथी मचा कलाकारपिनिगु नं अभिनय स्वयेखनी ।

पिदनेत्यंगु ‘मोहनी भोजय्...’ म्यूजिक भिडियो यूट्युब च्यानलया नितिं सिम्रिक संकिपा इन्टरटेन्टमेन्ट व जे.एल. ट्रेडया निर्माणय् पिदनेत्यंगु नेपालभाषाया म्यूजिक भिडियो खः ।

(थन क्लीक यानाः थौं मंगलवाः सनिलया ५ ता इलय् सार्वजनिक जुइगु एरोन महर्जन व सिम्रिक श्रेष्ठया मोहनी भोजय्... म्येया म्यूजिक भिडियो स्वयादिसँ ।)

Youtube Channel : https://www.youtube.com/channel/UCMkLrwTSHOZm0GiZQRrWpRg

Categorized in कला