city axpris 2

सिमकार्ड हाकनं मिइ मदइगु

नेवा: अनलाइन न्युज – ललेन्द्र शाक्य | २०७९ पौष २१, बिहिबार ११:१२:५०

दूरसंचार सेवा प्रदायकपिन्सं निष्क्रिय सिमकार्ड हाकनं मिइ मदइगु जूगु दु । सर्वोच्च अदालतं तत्कालया नितिं उगु व्यवस्था कार्यान्वयन मयाकेत अन्तरिम आदेश जारी याःगु खः ।

अधिवक्ता सपना भण्डारीं संचार व सूचना प्रविधि मन्त्रालययात विपक्षी दयेकाः दायर याःगु रिटय् न्यायाधीश सुष्मलता माथेमाया एकल इजलासं उगु आदेश ब्यूगु खः ।

छम्हेसिगु नामय् जारी जुयाः छ्यलाबुला जुयाच्वंगु सिमकार्ड खुलातक छ्यलाबुलाय् मवःसा उगु नम्बर खारेज जूगु मितिपाखें खुला लिपा हाकनं वितरण यायेगु कथं नेपाल दूरसंचार प्राधिकरणपाखें जारी निर्देशन नेपाःया संविधान धारा २८ पाखें प्रदत्त गोपनीयताया हकविरुद्ध जूगु निवेदनय् न्ह्यथंगु खः । उगु निवेदनया क्वमचाःतलेतक प्राधिकरणपाखें जारी जूगु उगु निर्देशन कार्यान्वयन मयायेत अदालतं अन्तरिम जारी याःगु खः ।

सर्वोच्चं निवेदकया माग कथं आदेश जारी जुइम्वाःगु आधार जूसा सबुत प्रमाणलिसें झिंन्यान्हुया दुने लिखित लिसः पेस यायेत तकं आदेश ब्यूगु दु । नेपाल दूरसंचार प्राधिकरणं २०७१ साल चैत्र २ गते खुलातक छ्यलाबुला मजूगु सिमकार्ड सेवा प्रदायकं निष्क्रिय यायेगु व्यवस्था लागू याःगु खः ।

लिपा २०७७ भाद्रय् उगु व्यवस्थायात परिमार्जन यासें दच्छितक निष्क्रिय सिमकार्ड मिइमदइगु व उगु ई थ्यनेधुंकाः धाःसा मिइ दइगु व्यवस्था प्राधिकरणं यानाब्यूगु खः ।

Categorized in बजाः