Header Nepal rastra bank Adv

सिके राउत जसपाया नायः उपेन्द्र यादवविरुद्ध चुनाव ल्वाइगु

नेवा: अनलाइन न्युज – ललेन्द्र शाक्य | २०७९ श्रावण २०, शुक्रबार १२:३२:५९

जनमत पार्टीया नायः डा. सिके राउत जनता समाजवादी पार्टी(जसपा)या नायः उपेन्द्र यादवविरुद्ध चुनाव ल्वाइगु जूगु दु ।

न्ह्यःया निर्वाचनय् नायः यादव निर्वाचित जूगु सप्तरी क्षेत्र ल्याः २ पाखें प्रतिनिधि सभा दुजलय् ल्वायेगु राउतं घोषणा याःगु खः । नायः यादव थुगुखुसि नं वहे क्षेत्रपाखें चुनाव ल्वायेगु तयारीइ दु ।

डा. राउतं बिहिवाः जनकपुरधामय् च्वंगु बैठकय् थःत सप्तरी २ पाखें चुनावय् थनेगु विषयस सहलह ब्याकूगु धाःगु दु । डा. राउतं धाःगु दु, ‘उगु सहलह कथं वहे क्षेत्रपाखें चुनाव ल्वायेगु जुइ ।’

सरकारं ४ मंसीरय् प्रतिनिधि व प्रदेश सभाया निर्वाचन तिथि घोषणा यायेधुंकूगु दु । निर्वाचन घोषणालिपा नेतापिं उम्मेदवारी घोषणा यायेगुलि ब्वाँ जुइधुंकूगु दु ।

छु दु अवस्था ?

थ्व निर्वाचन क्षेत्रय् प्यंगू पालिका दु । गुगुमध्ये निगुलि लोकतान्त्रिक समाजवादी (लोसपा), जसपा व कांग्रेस छगू छगू पालिकाय् निर्वाचित जूगु दु ।

सदरमुकाम राजविराज नगरपािलकाय् जसपा, सिके राउतया छेँदूगु महादेवालिसें छिन्नमस्ता गाउँपालिकाय् लोसपा व तिलाठी कोइलाडी गाउँपालिकाय् कांग्रेस त्याःगु खः ।

राउतया छेँ दूगु महादेवाया वडा ल्याः २ स धाःसा वया हे पार्टी जनमत त्याःगु खः ।

जिल्लान्यंकं जनमतं निगू पालिका हनुमान नगर व बलान बिहुल त्याःगु दु तर वं चुनाव ल्वायेगु घोषणा याःगु क्षेत्र ल्याः २ स मलाः ।

स्थानीय तहया मतरिणाम कथं जसपा व जनमत निगुलिं लोसपा व कांग्रेससिबें कमजोर खनेदु ।

Categorized in राजनीति