नेवा: अनलाइन न्युज – ललेन्द्र शाक्य | ने.सं. ११४४ बछलाथ्व नवमी (२०८१ जेष्ठ ४ गते) शुक्रवाः

सत्तारुढ व विपक्षी दलत ब्यागलं ब्यागलं सहलहस ब्वां जूगु दु ।

प्रमुख प्रतिपक्षी दल नेपाली कांग्रेस, राष्ट्रिय प्रजातन्त्र पार्टी (राप्रपा), लोकतान्त्रिक समाजवादी पार्टी (लोसपा) लिसेंया विपक्षी दलत न्हूबानेश्वरय् सहलहस ब्यस्त जुयाच्वंगु दु । सहलह संसद भवनय् च्वंगु प्रमुख प्रतिपक्षी दलया नेताया कार्यकक्षय् जुयाच्वंगु दु ।

थ्वहे इलय् सत्तारुढ दलय् आबद्ध दलया शीर्ष नेतापिं नं सहलहस व्यस्त जूगु दु ।

नेकपा एमालेया नायः केपी शर्मा ओली, नेकपा माओवादी केन्द्रया नायः पुष्पकमल दाहाल प्रचण्ड, राष्ट्रिय स्वतन्त्र पार्टी (रास्वपा)या सभापति रवि लामिछाने दथुइ सिंहदरबारय् सहलह जुयाच्वंगु दु ।

कांग्रेसं उपप्रधान व गृहमन्त्री रवि लामिछानेयात सहकारीया रकम अपचलन याःगु द्वपं बिसें वयाच्वंगु दु । थुकी संसदीय छानविन समिति नीस्वनेमाःगु कांग्रेसया माग दु ।

थुकी सहमति जुइमफुबलय् संघीय संसदय् लिच्वः लानाः वयाच्वंगु दु ।

बिहिवाः प्रतिनिधिसभाया बैठकय् कांग्रेस व एमालेया सांसदपिं दथुइ घ्वात्तुघ्वायेगु कासा तकं जूगु खः ।

थौं शुक्रवाः सुथय् ११ ता इलय् सःताःतःगु प्रतिनिधिसभाया बैठक न्ह्याये फयाच्वंगु मदुनि । सभामुख देवराज घिमिरे व राजनीतिक दलया प्रमुख सचेतकपिं नं सहलहस व्यस्त जूगु दु ।

Categorized in राजनीति