सिंहदरबारय् प्रहरी व चिनियाँ नागरिकदथुइ ल्वापु
नेवा: अनलाइन न्युज – ललेन्द्र शाक्य | २०७७ बैशाख २६, शुक्रबार १६:४८:४६
चिनियाँ नागरिकपिं सिंहदरबार दुहाँ वनेत्यंबलय् प्रहरीं प्रतिकार याःगु दु ।
थथे प्रतिकार याःबालय् प्रहरी व चिनियाँ नागरिकदथुइ ल्वापु तकं जूगु दु ।
महानगरीय प्रहरी परिसरया एसएसपी श्याम ज्ञवालीं धाःकथं सुं चिनियाँ नागरिकपिं मुनाः सिंहदरबार दुहाँ वनेत्यंबलय् अन ल्वापु जूगु खः ।
प्रहरीं बल छ्यलाः चिनियाँ नागरिकपिन्त नियन्त्रणय् काःगु खः ।
थःगु देय् लिहाँ वने दयेमाः धैगु माग तसें सिंहदरबारय् धर्ना ब्यूवंपिं चिनियाा नागरिक व प्रहरी दथुइ ल्वापु जूगु खः ।
छुं नं जानकारी मब्यूसे लकडाउनया निषेधित क्षेत्र तोडे याःगुलिं प्रहरीं चिनियाँ नागरिकपिन्त नियन्त्रणय् कायेगु झ्वलय् ल्वापु जूगु खः ।
म्हानगरीय प्रहरी ज्याकुथि लानिपुखूया प्रमुख विश्वराज पोखरेलया कथं सिंहदरबार न्ह्यःने ३३ म्ह चिनियाँ नागरिक मुंगु खः । सुरक्षाकःमि भीड तितरवितर यायेत थ्यंकूबलय् चिनियाा नागरिकपिन्सं प्रहरीयात ल्वहँ अप्पां क्वयेकूगु पोखरेलं धाःगु दु ।
वहे झ्वलय् ३३ म्ह हे चिनियाँ नागरिकपिं गिरफ्तारीइ लाःगु खः । चिनियाँ नागरिक व प्रहरी दथुइ जूगु घम्साघम्सीइ महानगरीय प्रहरी वृत्त सिंहदरबारया डिएसपी हरिबहादुर बस्नेत, छम्ह मिसाम्ह प्रहरी व चिनियाँ नागरिकपाखे स्वम्ह घाःपाः जूगु दु ।
घाःपाः जूम्ह डिएसपी बस्नेतया प्रहरी अस्पतालय् व मिसा प्रहरी ट्रमा सेन्टरय् वासः जुयाच्वंगु जानकारी ब्यूगु दु ।
