नेवा: अनलाइन न्युज – ललेन्द्र शाक्य | २०८० भाद्र २७, बुधबार १३:५३:१४

नेपालय् दकले न्हापां नयेगु ‘चि’या व्यवस्थित आपूर्ति याःगु संस्था साल्ट ट्रेडिङ कर्पोरेशनया ६१ क्वःगु दँमुँज्या जूगु दु ।

थनी ६१ दँ न्ह्यः भारतं चि आयात यानाः गुणस्तरीय चि या वितरण व आपूर्ति व्यवस्थापन याःगु थुगु संस्था थौंया दिंतक थ्यंबलय् घ्यः व चिकं, ग्याँस, छुचुं लिसें कृषि मलतकया वितरण व्यवस्थापन यानाच्वंगु दु ।

थुगु संस्थाया ६१ क्वःगु दँमुँज्या थौं बुधवाः साल्ट ट्रेडिङया थःगु हे भवनया परिसर कालिमातिइ जूगु दु । उगु दँ मुँज्याय् मूपाहाँ कथं उद्योग वाणिज्य आपूर्तिमन्त्री रमेश रिजाल झायादीगु खःसा ज्याझ्वलय् सकलसित लसकुस लिसें साल्ट ट्रेडिङ कर्पोरेशनया वार्षिक प्रगति विवरण कर्पोरेशनया कार्यकारी प्रमुख उर्मिला श्रेष्ठं न्ह्यब्वयादीगु खः ।

ज्याझ्वलय् कर्पोरेशनया पुलांम्ह नायः लक्ष्मीदास मानन्धरया नामं नीस्वनातःगु लक्ष्मीदास बालहितकारी सिरपाः झापाया विर्तामोडय् चायेकातःगु मचापिनिगु संरक्षण समितियात लःल्हाःगु दु ।

अथेहे, ज्याझ्वलय् ईश्वरलाल प्रधान व हेमबहादुर मल्ल सिरपाः नं लःल्हाःगु दु ।

उगु ज्याझ्वलय् कर्पोरेशनया नीदँतक ज्या यायेधुंकूपिं कर्मचारीपिन्त सम्मान यायेगु लिसें कर्मचारीया मचापिन्त आखः ब्वनेत थीथी सिरपाः नं लःल्हाःगु खः ।

Categorized in राष्ट्रिय