prabhu baink new

सार्वजनिक सवारीया फुक्क सिटय् यात्रु तयेत खुल्ला, भाडा आः पुलांगु हे रेट

नेवा: अनलाइन न्युज – ललेन्द्र शाक्य | २०७७ आश्विन २७, मंगलबार ११:५४:५३

सरकारं सार्वजनिक सवारीइ नं फुक्क सिटय् यात्रु तयेके बिइगु निर्णय याःगु दु । मन्त्रिपरिषदया सोमवाः च्वंगु बैठकं अप्वलय् बच्छि सिट क्षमताय् चलेयायेमाःगु न्हापाया निर्णय उल्टेयाःगु दु ।

सरकारं सार्वजनिक यातायात संचालन याके बिइधुंकाः छगू लहरय् छम्ह जक यात्रु तयेमाःगु व भाडा अप्वयेकाः ५० प्रतिशत कायेके बियगु निर्णय याःगु खः । आन्तरिक हवाई उडानय् नं थ्वहे धाःगु खः । तर हवाई सेवा प्रदायक कम्पनीतसें नागरिक उड्डयन मन्त्रालयलिसे समझदारी यानाः फुक्क सिटय् यात्रु कुबियाः वयाच्वंगु दु ।

आः मोहनीया इलय् यात्रुया चाप जुइगु जूगुलिं सार्वजनिक यातायातय् नं सामाजिक सुरक्षाया मापदण्ड छ्यलाः पूरा क्षमताय् यात्रु तयेके बियगु तर, भाडा पुलांगु हे दरय् कायेमाःगु निर्णय याःगु दु ।

बैठकं अन्तर्राष्ट्रिय सीमा नाका व अन्तर्राष्ट्रिय उडानय् आःया व्यवस्थायात कार्तिक मसान्ततक कायम हे तयेगु निर्णय याःगु छम्ह मन्त्रीं जानकारी ब्यूगु दु ।

बैठकं आम नागरिकपिन्त गन खः, अन हे च्वना मोहनी न्यायेकेत व स्वनिगःपाखें गामय् मवनेत आग्रह यायेगु निर्णय नं याःगु दु ।

Categorized in बजाः