nepal life 2076 3 18

सार्वजनिक यातायातय् लितमबिइगु नितका दांया ल्याःचाः, न्हिथं थ्यंमथ्यं ४० लख ठगी !

नेवा: अनलाइन न्युज – ललेन्द्र शाक्य | २०७८ मङ्सिर १, बुधबार १४:३१:३१

बागमती प्रदेशय् कार्तिक १ निसें लागू जूगु न्हूगु भाडादर कथं सार्वजनिक सवारीसाधनय् च्वनेखतं ५ किलोमिटरतक १८ तका भाडा पुलेमाः । अथेहे, १० किलोमिटरतक २३ तका व १५ किलोमिटरतक २७ तका भाडा पुलेमाः । यात्रुपिं धाःसा उज्वःगु रुटय् २०, २५ व ३० तका दां पुलेत बाध्य जुयाच्वंगु दु ।

राष्ट्र बैंकं छतका नितका वंगु दांया नोट छापेयायेगु त्वःतेधुंकूगु दु । यात्रुं छतका नितकाका मोहः नं घानातःगु जुइमखु । उकिं यात्रुं अप्वः भाडा पुले हे माःगु अवस्था ब्वलनाच्वंगु दु । सुं यात्रुं नितका दां लितहिं धकाः धाःसा आपालं सहचालकं खुद्रँ मदु धकाः लिफः स्वइ । गुलिं गुलिं बसया सहचालकं यात्रुयात चकलेट बिइगु यानाच्वंगु दु ।
यक्व धयाथें यात्रु नितका दांया नितिं विवाद यायेचाहे जुइमखु । इमिसं छक् बस गइबलय् नितका दां ठगेयाःगुयात सामान्य कथं काइ । यातायात व्यवस्था विभागं थुकिया बारे अनुगमन, कारवाही व अध्ययन यायेत च्यूताः क्यंगु मदु ।

तर यात्रुपिंलिसे जुइगु थुज्वःगु कथंया ठगीया ल्याःचाः हिसाब यायेगु खःसा व अंक असामान्य खनेदु ।

यातायात व्यवसायी राष्ट्रिय महासंघया कथं स्वनिगलय् न्हिथं थ्यंमथ्यं २५ लख यात्रु छक्वःखुसिं ल्यायेखायेबलय् सार्वजनिक सवारी छ्यलाबुला याइगु अनुमान दु ।

छम्ह यात्रुं न्हिथं निक्वःतक सार्वजनिक यातायातया साधनय् च्वनीबलय् प्यतका दां अप्वः पुलेमाः । थथे लच्छिइ १२० तका व दच्छिइ १ हजार ४४० तकातक ठगेयाइ ।

थथे फुक्क यात्रु ठगेजुइबलय् यातायात व्यवसायीयात धाःसा समग्रय् तःधंगु ठगी नाफा जुइगु अवस्था ब्वलनाच्वंगु दु ।

२०७३ सालय् न्यूनतम १३ तका दां भाडा कायम याःलय् नं थथेहे ठगी खनेदयेधुंकाः यातायात व्यवस्था विभागं छड्केपाखें नमूना अध्ययन याःगु खः । उगु इलय् ८० प्रतिशत यात्रुं नितका दां लितकाये मखंगु खनेदूगु खः ।

आः नं वहे समस्या दोहोरे जूगु दु । २०७३ सालय् थें आः नं ८० प्रतिशत यात्रु ठगेजुयाच्वंगु मानेयायेगु खःसा स्वनिगलय् न्हिथं २० लख यात्रुपिन्सं नितका दां लितकाये खनाच्वंगु मदु अर्थात् न्हिथं थ्यंमथ्यं ४० लख तका दांतक ठगी जुयाच्वंगु दु । थ्वहे सिलसिला न्ह्यानाच्वंसा यात्रुपाखें दच्छिइ १ अर्ब ४६ करोड तका दांसिबें अप्वः ठगी जुइ ।

गुनासो वःसा जक कारवाही

सार्वजनिक सवारीया अनुगमन याइगु निकायत धाःसा यात्रुया गुनासो गुबले वइ धकाः पियाच्वंगु दु । तर, लिपांगु दिनय् गुनासो याइपिनिगु ल्याः हे म्हो जूगु महानगरीय ट्राफिक प्रहरी महाशाखाया सहायक प्रवक्ता सन्तोष रोकां धाःगु दु ।

प्रहरी नायव उपरीक्षक डिएसपी रोकाया कथं, न्हूगु भाडा दर लागू जुइधुंकाःया छुं दिं दां लितकाये मखंगु धासें न्हिथं २२–२५ गूतक गुनासो वइगु खः । वं धाःगु दु, आः ला व ल्याः न्हिथं निगू स्वगुलि क्वाहाँ वंगु दु ।’

खासयानाः तःग्वःगु बसया यात्रुपिं नितका दां ला खःनि धकाः त्वःताः वनीगु डिएसपी रोकाया अनुमान दु । ट्याकसीं याइगु ठगीया समस्या धाःसा तःधं हे जूगु रोकां धाःगु दु, ‘न्हिथं ५० गःतक ट्याक्सी अप्वः भाडा काःगु कसूरय् कारवाहीस लानाच्वंगु दु ।’

यातायात व्यवस्था विभागया प्रवक्ता डा. लोकनाथ भुसाल धाःसा खुद्रा चानसुन दां ज्वनाः जुइत यात्रुपिन्त हे सुझाब ब्यूगु दु । वं धाःगु दु, ‘न्हापां ला यात्रु थः हे सचेत जुइमाः, भाडाय् ठगेजुल धाःसा ट्राफिक वा विभागय् खबर यायेत इनाप यानाच्वना ।’

सार्वजनिक सवारीसाधनं ‘खुद्रा दां मदु’ धकाः ठगेयाये मदइगु, खुद्रा मदु धकाः चकलेट बिइगु ज्या नं बन्द यायेमाःगु धासें विभागया प्रवक्ता भुसालं धाःगु दु, ‘उज्वःगु सवारीबारे उजुरी लाःसा १ हजारनिसें ५ हजार तकातक जरिवाना यायेगु जुइ ।’

दोष सरकारयात

नेपाल यातायात व्यवसायी राष्ट्रिय महासंघ सार्वजनिक सवारीइ यात्रुं दां लितकाये खनामच्वंगु स्वीकार याःगु दु । तर, थ्व अवस्था वःगुलि सरकार हे दोषी जूगु वया धापू दु ।

महासंघया महासचिव सरोज सिटौलां धाःगु दु, ‘संघ सरकारं ताःहाकःगु दूरीया सवारीइ २८ प्रतिशत भाडा थकाःबलय् प्रदेश १ पाखें २२ व बागमती प्रदेशं २३ प्रतिशत जक थकाल । वैज्ञानिक तवरं मूल्य समायोजन मयाःबलय् थुज्वःगु समस्या वःगु खः ।’

अय्सां, थःपिं सरकारं क्वःछ्यूगुसिबें अप्वः भाडा काइपिन्त कारवाही यायेगु पक्षय् हे दूगु दाबी याःगु दु सिटौलां । महासचिव सिटौलां धाःगु दु, ‘थ्व परिस्थिति वःगुलि मुलतः प्रदेश सरकारत जिम्मेवार दु । यातायात व्यवसायी महासंघया पाखें जिमिसं ला सवारीधनी, चालक, सहचालक फुक्कसित अप्वः भाडा मकायेत धयागु दु ।’

Categorized in बजाः