nepal investment baink

सामाजिक सन्देश ज्वनाः बागमति भाईया म्युजिक भिडियो पितब्वज्या

नेवा: अनलाइन न्युज – विजयरत्न | ने.सं. ११४४ सिल्लागा तृतीया (२०८० फागुन ३० गते)

बागमति भाईया नामं बिस्कं म्हसिका दुम्ह सुन्दरमान श्रेष्ठं च्वयादीगु “अयलाः अप्वः त्वने मजिउ” धइगु  सामाजिक सन्देश ज्वनाः नेपालभाषाया न्हूगु म्ये  “लहिना तयागु दुधाः” या म्युजिक भिडियो प्रिमियर मंगलवाः  रञ्जना सिनेप्लेक्सय् जूगु दु  ।

उगु म्युजिक भिडियो निर्माण नेवाः साधना कला केन्द्रपाखें जुउगु खः ।

नेवाः संगीत ख्यःया न्हूम्ह म्येहालामि नानीशोभा महर्जनं हालादीगु थ्व म्येया संगीतकार, एरेन्जर, मिसिङ व मास्टरिङ नांजाःम्ह संगीतज्ञ दिप तुलाधरं यानादीगु खः । थ्व म्युजिक भिडियोस सरस्वती मानन्धर, सुरेन्द्र श्रेष्ठ, नायिका मिरा डंगोल, राजेश श्रेष्ठ,  शुद्धलक्ष्मी श्रेष्ठ, ताराराम मुनकःमि व बालकलाकार सुजी नेपालीया मू भुमिकाया नापनापं  प्रेम कार्की व शोभा कार्कीपिन्सं नं अभिनय यानादीगु दु ।

म्युजिक भिडियोया समाः मिरा डंगोल, क्यामेरा, सम्पादन व कलरिङ राजेश शाक्यं यानादीगु खःसा निर्देशन नेपाःया पुलांम्ह कलाकःमि ,च्वमि व निर्देशक पवन जोशीं यानादीगु खः ।

म्युजिक भिडियो पितब्वज्या ज्याझ्वः नेवाः साधना कला केन्द्रया नायःलिसें थ्व म्येया च्वमि सुन्दरमान श्रेष्ठ (बागमति भाई) या सभानायःसुइ जुउगु खः । मूपाहाँ कथं वरिष्ठ संगीतकार धनबहादुर गोपाली झायादीगु उगु ज्याझ्वलय् विशिष्ट पाहाँपिं वरिष्ठ पत्रकार नेपालभाषाया न्हापांम्ह म्युजिक भिडियो निर्देशक विजयरत्न असंबरे, म्येहालामि समाजसेवी सरिता महर्जन, येँ वडा ल्याः १८ या वडाध्यक्ष न्हुच्छेकाजी महर्जन, साहित्यकार विक्रमभक्त नोशी व साहित्यसेवी एवं नेवाः साधना कला केन्द्रया सल्लाहकार पौभाः सायमि झायादीगु खः ।

ज्याझ्वलय् मूपाहाँ गोपालीं नेपाःया समाजय्  मद्यपानका हुनिं जुयाच्वंगु परिवारय्  विपत्तियात कलात्मक रुपं क्यनातःगुलिं समाजय् सकारात्मक सन्देश वनी धकाः धयादिल ।

अथेहेतुं कला केन्द्रया सल्लाहकार पौभाः सायमिं राज्यं हे नेपालभाषा व नेपाल संवतयात सरकारी मान्यता बिइधुंकुगु दु उकिं  नेपालभाषाया ज्याझ्वलय् जनस्तरं हे नेपाल संवत् व नेवाः भाय छ्यलाबुलाय् हयेमाल धकाः धयादिल ।

नेवाः साधना कला केन्द्रपाखें मिनर्वा श्रेष्ठं लसकुस यानादीगु ज्याझ्वलय्  सिने पत्रकार विजयरत्न असंबरें म्युजिक भिडियोया समीक्षा यानादीगु खः। अथेहेतुं येँ महानगरपालिका वडा ल्याः १८ या वडाअध्यक्ष न्हुच्छेकाजी महर्जनं नेपालभाषाया विकासय् योगदान दुपिं संगीतख्यःया सकसिया प्रवद्र्धन यायेगु आज्जु ज्वनाः निकट भविष्यय् छगू तःजिगु महोत्सव यायेगु ग्वसाः जुयाच्वंगु खँ न्ह्यथना दिल ।

अथेहेतुं ज्याझ्वलय् शान्ति खलःया संस्थापक समाजसेवी कृष्णबहादुर साहु श्रेष्ठ, म्येहालामि नानीशोभा महर्जन व सल्लाहकार पौभाः सायमिपिन्त नं सम्मान याःगु खः ।

 

Categorized in कला