zero media family planning adv

सामाजिक संजालय् च्वइपिन्त न्यादँ जेल व १५ लख जरिवाना पुइकेगु विधेयक पेस

नेवा: अनलाइन न्युज – ललेन्द्र शाक्य | २०७७ चैत्र २६, बिहिबार १०:५२:४४

सामाजिक संजालय् च्वःगु बापत प्रयोगकर्तायात न्यादँ जेल व १५ लख तका दां जरिवाना पुइकेगु प्रावधान दूगु सूचना प्रविधिसम्बन्धी विधेयक थौं बिहिवाः प्रतिनिधिसभाय् पेस जुइगु जूगु दु । विकास व प्रविधि समितिं कांग्रेस बाहेकया सांसदया बहुमतपाखें पारित याःगु विधेयकया प्रतिवेदन प्रतिनिधिसभाय् पेस यायेत्यंगु खः ।

सरकारया हे चाहना कथं समितिं विधेयक न्ह्यःने यंकुगु कांग्रेस सांसदपिन्सं धाःगु दु । समितिं पारित याःगु प्रतिवेदन कथं कानून दयेकूसा अनलाइनय् बुखँ च्वःगुया हे आधारय् उकिया संचालक व पत्रकार, वहे बुखँ सामाजिक संजालय् सेयर याःगु व थःगु विचाः च्वःगुया हे आधारय् सर्वसाधारण जेल वनेमालगिु जुइफु ।

सरकारं हःगु विधेयकयात कांग्रेस सांसदया विरोध जूसां नं समितिपाखें माओवादी व एमाले सांसदं बहुमतया आधारय् २०७६ पुस निगूगु वा पारित याःगु खः । विधेयकया प्रावधान संविधानया मर्म व भावना अःखः जूगु लिसें थुकिं नागरिकया स्वतन्त्रता व मौलिक हक हनन याइगु जूगुलिं कांग्रेस विधेयकया विपक्षय् दूगु सांसद संजय गौतमं धाःगु दु ।

Categorized in राजनीति