city axpris 2

सामाजिक परिवेशय् ब्वलनाच्वंगु यथार्थ बाखँ ‘उच्च शिक्षा’या पत्रकार सम्मेलन क्वचाल

नेवा: अनलाइन न्युज | २०७९ माघ ८, आइतबार १४:२९:३१

माघ ७ गते शनिवाः किपूया १० वडाय् च्वंगु जोशीननी हेरिटेज होम्स एण्ड नेवाः रेष्टुरेन्टय् मगन इन्टरटेन्टमेन्टया लुखां पिदनीगु न्हूगु चिहा संकिपा ‘उच्च शिक्षा’या विषयस पत्रकार सम्मेलन क्वचाल ।

उगु पत्रकार सम्मेलनय् चिहा संकिपा ‘उच्च शिक्षा’ या च्वमि व निर्देशक रजिन महर्जन, संकिपाया मू कलाकारपिं लक्ष्मीकुमार महर्जन उदास, न्हूम्ह युवा कलाकार क्रिशल श्रेष्ठ व संकिपाकःमि प्राविधिक कलाकार सुदीप भजुं ‘उच्च शिक्षा’ चिहा संकिपा व संकिपा निर्माणया झ्वलय् थःथःगु अनुभव लिसें ‘उच्च शिक्षा’ छु खः धैगु विषयस थःथःगु धारणा तःगु खः ।

उगु पत्रकार सम्मेलनय् संकिपा च्वमि व निर्देशक रजिन महर्जनया लसय् व सलय्, ईश्वर दाहालया रचना व सुरेन्द्र श्रेष्ठं संगीत संयोजन यानातःगु चिहा संकिपा ‘उच्च शिक्षा’या प्रोमोशनल म्ये ‘आफै जान्ने...’ बोलया म्येया भिडियो नं न्ह्यब्वःगु खः ।

पत्रकार सम्मेलनय् ‘उच्च शिक्षा’ या च्वमि व निर्देशक रजिन महर्जनं ‘उच्च शिक्षा’ छगू सामाजिक परिवेशय् थौंकन्हय् ब्वलनाच्वंगु यथार्थ बाखनय् आधारित चिहा संकिपा जूगु जानकारी उपस्थित पत्रकारपिनिगु दथुइ जानकारी ब्यूगु खः ।

अथेहे, ज्याझ्वःया न्ह्यसः तयेगु व अन्तरक्रिया इलय् नेपालभाषा सिने पत्रकारिता क्षेत्रया न्हापांम्ह सिनेपत्रकार लिसें नेपालभाषा म्यूजिक भिडियो क्षेत्रया दकले न्हापांम्ह म्यूजिक भिडियो निर्देशक विजयरत्न असंबरे, नेवाः राष्ट्रिय पत्रकार दबूया पुलांम्ह केन्द्रीय नायः लिसें संगीतकःमि व संचारकःमि सुरजवीर बज्राचार्य, किपुली पिदनाच्वंगु सहीद साप्ताहिकया सम्पादक नारायण महर्जन, किपुलिं हे पिदनाच्वंगु ज्वजलपा वाःपौ व कीर्तिपुर सन्देश साप्ताहिकया प्रकाशक सम्पादक नजरराम महर्जन लिसें लुभूया केविएस प्रोडक्सनया कृष्णभक्त श्रेष्ठपिन्सं थःथःगु नुगःखँ नापनापं ‘उच्च शिक्षा’ चिहा संकिपाया विषयस जिज्ञासा व न्ह्यसः तःगु खःसा उगु जिज्ञासा व न्ह्यसःया लिसः बिसें ‘उच्च शिक्षा’ चिहा संकिपाया निर्देशक व च्वमि रजिन महर्जनं सहजीककरण याःगु खः ।

चिहा संकिपा ‘उच्च शिक्षा’ या निर्मात्री जमुना महर्जनं उगु संकिपाया कलाकार, प्राविधिक लिसें ग्वाहालिमिपिन्त मतिनाया चिं कथं लसता पौ लःल्हाःगु उगु पत्रकार सम्मेलन नेवाः अनलाइनन्यूजया सम्पादक किपूया ललेन्द्र शाक्यं न्ह्याकूगु खः ।

पत्रकार सम्मेलनय् उगु चिहा संकिपा ‘उच्च शिक्षा’ वइगु माघ ११ गते बुधवाः किपूया पांगाय् च्वंगु कीर्तिपुर सिनेप्लेक्स हलय् विशेष प्रिमियर शो जुइगु व माघ १२ गते बिहिवाः श्रीपंचमी ससुपूजाया दिं मगन इन्टरटेन्टमेन्टया अफिसियल यूट्युब च्यानलय् सार्वजनिक जुइगु जानकारी नं ब्यूगु खः ।

Categorized in कला