साफ यू १९ च्याम्पियनसिपया तयारी पूवन, टिकट मू निसः व स्वसः
नेवा: अनलाइन न्युज – ललेन्द्र शाक्य | २०८० आश्विन २, मंगलबार १५:३२:२०
बिहिवाःनिसें येँया दशरथ रंगशालाय् न्ह्याइगु साफ यू १९ च्याम्पियनसिपया सकतां तयारी पूवंगु दु ।
अखिल नेपाल फुटबल संघ एन्फां मंगलवाः पत्रकार सम्मेलन यासें च्याम्पियनसिपया तयारी पूवंगु जानकारी ब्यूगु खः ।
एन्फा प्रवक्ता सुरेश शाह नं च्याम्पियनसिपया तयारी पूवंगु व सहभागी टिमत वयेगु क्रमय् जूगु धाःगु दु ।
भुटान व बंगलादेशया टिम थ्यनेधुंकूगु दुसा भारत व माल्दिभ्सया टोली थौं मंगलवाः वइगु जूगु दु । पाकिस्तान धाःसा कन्हय् बुधवाः थ्यनीगु एन्फां जानकारी ब्यूगु दु ।
साउथ एसियन फुटबल फेडरेशन (साफ) या ज्याझ्वः अन्तर्गत जुइगु च्याम्पियनसिपय् नेपाःलिसें खुगू राष्ट्रं धेँधेँबल्ला याइगु जूगु दु ।
ग्वसाः खलः नेपाल, पाकिस्तान व माल्दिभ्स समूह ए दुने दुसा साविक विजेता भारत, साविक उपविजेता बंगलादेश व भुटान समूह बी दुने दु । निगुलिं समूहपाखें शीर्ष निगू टिम सेमिफाइनलय् दुहाँ वनी ।
वंगु दँ भारतया भुवनेश्वरय् जूगु च्याम्पियनसिपय् पाकिस्तान व भुटान बाहेक न्यागू टिम सहभागी जूगु व सिंगल राउण्ड रोविनया आधारय् धेँधेँबल्ला जूगु खः ।
थुगु खुसि पाकिस्तान व भुटान च्याम्पियनसिपय् सहभागी जूगु दुसा श्रीलंका सहभागी जूगु मदु ।
च्याम्पियनसिपया थ्व न्याक्वःगु संस्करण खः । सन् २०१५ स नेपालं सुरु जूगु थुगु च्याम्पियनसिपय् नेपाल व भारतं समान निक्वःतक उपाधि त्याकेधुंकूगु दु ।
नेपालंस्वक्वःगुखुसि साफ यू १९ च्याम्पियनसिप ग्वसाः ग्वयेत्यंगु खः । २०१९ स धाःसा नेपाल समूह चरणपाखें हे पिहाँ वंगु खः ।
जियारथ शेखया कप्तानीइ दूगु नेपाली टोलीं थुगु खुसि घरेलु मैदान उपाधि त्याकूसें विगतया प्रदर्शनयात दोहोरेयायेगु आज्जु तःगु दु ।
कासाया निर्देशक संजीव मिश्रं कासाया सुथांलाक्क ग्वसाः ग्वसें कम्ती नं फाइनलतक थ्यनीगु आज्जु दूगु धाःगु दु ।
कासाया नितिं भीआईपी प्यारापिटपाखे स्वसः व साधारण प्यारापिटपाखे निसः तका टिकट मू तःगु दु ।
कासा स्पोर्ट्जवर्कजया युट्युब च्यानलय् प्रत्यक्ष प्रसारण जुइगु धाःगु दु ।
सहभागी टोलीया नितिं नेपाली सेनाया भद्रकाली खेलमैदान व च्यासलय् च्वंगु च्यासल खेल मैदानय् प्रशिक्षण यायेगु व्यवस्था याःगु दु ।
च्याम्पियनसिपया बजेट २ करोड ७७ लख ३२ हजार ८ सय तका जूगु एन्फां जानकारी ब्यूगु दु ।
च्याम्पियनसिपया नितिं बजेट साफं प्रदान याइगु एन्फा प्रवक्ता सुरेश शाह नं जानकारी ब्यूगु दु ।
Categorized in कासा
