Mohanai 2078 KTM

साफ च्याम्पियनसिप : श्रीलंकायात बुकल, नेपाः दकले न्ह्यःने

नेवा: अनलाइन न्युज – ललेन्द्र शाक्य | २०७८ आश्विन १९, मंगलबार १२:०३:०९

माल्दिभ्ससय् जुयाच्वंगु साफ च्याम्पियनसिप २०२१ य् नेपाल मदिक्क निक्वःगु जित ल्हाःतय् लाकूगु दु ।

सोमवाः बहनी जूगु कासाय् नेपालं श्रीलंकायात ३–२ गोल अन्तरं बुकूगु खः । नेपाःया नितिं सुमन लामा, अन्जन विष्ट व आयुष घलानं गोल याःगु खः । नेपालं न्हापांगु कासाय् ग्वसाःखलः माल्दिभ्सयात १–० गोल अन्तरं बुकूगु खः ।

मदिक्क निक्वःगु जित धुंकाः ६ ल्याः मुंकूगु नेपालं दकले च्वय् च्वंगु थासय् च्वनाः फाइनल थ्यनीगु सम्भावनायात बल्लाकूगु दु । श्रीलंकाया धाःसा थ्व मदिक्क निक्वःगु हार खः ।

अतिकं धेंधेंबल्ला कथं जूगु कासाय् श्रीलंकां सुरुवातनिसें हे नेपाःयात दबाब बिइगु स्वःसां नं नेपालं बल पोजेसनय् धाःसा सुरुवातनिसें लिपांगुखुसितक हे पकडय् तल ।

माल्दिभ्सया राजधानी मालेया नेशनल स्टेडियमय् जूगु कासाया ३१ औं मिनेटय् सुमन लामां गोल यासें नेपाःयात अग्रता ब्यूगु खः । राष्ट्रिय टिमया नितिं सुमनया थ्व न्हापांगु गोल खः । न्हापांगु हाफय् नेपालं अग्रता कायम हे तःगु खः ।

निक्वःगु हाफया सुरुइ हे नेपालं गोल थप यात । ५० औं मिनेटय् अन्जन विष्टं गोल यासें नेपाःया अग्रता दोब्बर यात । अन्जनं रिबाउण्ड बलय् गोल याःगु खः ।

५६ औं मिनेटय् श्रीलंकाया ह्यामिल्टनं गोल यासें ओल अन्तर म्हो याःगु खः । वधुंकाः निगुलिं टिमं कासाय् गोल यायेगु छुं ह्वताः (मौका) काःसां नं सदुपयोग यायेमफुत ।

सन्तोष तामाङं श्रीलंकन गोलकिपर सुजन परेरालिसे वान भर्सेस वानय् गोल याये मफुत । वैकल्पिक कासामिया रुपं मैदान दुहा“ वःम्ह आयुष घलानं ८३ औं मिनेटय् गोल यासें नेपाःयात ३–१ या अग्रता बिल । वधुंकाः नं वं गोलया ह्वताः काःसां नं सदुपयोग यायेमफुत । आयुषं राष्ट्रिय टिमया नितिं याःगु थ्व न्हापांगु गोल खः ।

इन्जुरी टाइमया स्वंगूगु मिनेटय् श्रीलंकाया डिलोन डे शिल्भां गोल यासें गोल अन्तर क्वपाःसां नं आखिरय् श्रीलंका बुत । शिल्भां पेनाल्टीइ गोल याःगु खः ।

न्यागू टिमदथुइ राउण्ड रोविनया आधारय् धेंधेंबल्ला जुयाच्वंगु कासाय् नेपालं थःगु स्वंगूगु कासा असोज २४ गते भारतलिसे म्हिती ।

नेपाःया कप्तान किरणकुमार लिम्बुं जितधुंकाः थ्व हे अन्त्य मजूगु व मेगु स्टेफ ल्य“दनीगु धाःगु दु । सोमवाःया कासा धुंकाः न्यान्हु विश्राम दूगुलिं आःया कासाय् भारतविरुद्ध मुक्कं ९० मिनेट कडा फाइट यायेगु वं धाःगु दु ।

अथेहे, प्रशिक्षक अबदुल्लाह अल्मुताइरीं लिच्वःपाखें सन्तुष्ट जूगु धाःगु दु ।

Categorized in कासा