Mohanai 2078 KTM

साफ च्याम्पियनसिप : माल्दिभ्सया न्हापांगु जित

नेवा: अनलाइन न्युज – ललेन्द्र शाक्य | २०७८ आश्विन २२, शुक्रबार ११:०७:११

साविक विजेता व घरेलु टिम माल्दिभ्सं साफ च्याम्पियनसिप २०२१ य् न्हापांगुखुसि त्याकूगु दु । राउण्ड रोविन अन्तर्गत थःगु निगूगु कासाय् माल्दिभ्सं बंगलादेशयात २–० गोल अन्तरं बुकूगु खः ।

माल्दिभ्सया राजधानी मालेय्च्वंगु नेशनल स्टेडियमय् बिहिवाः बहनी जूगु कासाय् माल्दिभ्सयात त्याकेत हाम्जा मोहमेद व अलि अस्फाकं गोल याःगु खः ।

न्हापांगु हाफ गोल मजूसां नं माल्दिभ्सं बंगलादेशयात निगूगु हाफय् निगू गोल नकूगु खः ।

कासाया ५५ औं मिनेटय् हाम्जां बाइसाइकल किकपाखें गोल यासें माल्दिभ्सयात अग्रता ब्यूगु खःसा ७४ औं मिनेटय् अस्फाकं पेनाल्टीइ गोल यासें माल्दिभ्सयात २–० गोल अन्तरं त्याकल ।

न्हापांगु कासाय् नेपाःलिसे बूगु माल्दिभ्सं बंगलादेशयात बुकेधुंकाः निगू कासापाखें ३ ल्याः मुंकूगु दु । स्वंगू कासा म्हितेधुंकूगु बंगलादेशया छगू जित, छगू बराबरी व छगू हार लिपा ४ ल्याः जूगु दु ।

मदिक्क निगू कासा म्हितूगु नेपाः ६ ल्याःलिसें शीर्ष थासय् दु । बंगलादेश निगूगु थासय् व माल्दिभ्स स्वंगूगु थासय् दु । अथेहे, निगू कासापाखें निगू बराबरीलिसें २ ल्या मुंकूगु भारत प्यंगूगु थासय् दु  । स्वंगू कासापाखें १ ल्याः मुंकूगु श्रीलंका दकले ल्यूने दुसा फाइनल थ्यंकेगु म्हगसं पिहाँ वनेधुंकूगु दु ।

आः नेपालं आइतवाः भारतलिसे म्हिती । उगु कासा त्याकूसा नेपाः छगू कासा न्ह्यः हे फाइनल थ्यनी । नेपालं बंगलादेशलिसे लिपांगु कासा म्हिती ।

Categorized in कासा