Mohanai 2078 KTM

साफ च्याम्पियनसिप : मनिषया गोलं माल्दिभ्सयात बुकल नेपालं

नेवा: अनलाइन न्युज – ललेन्द्र शाक्य | २०७८ आश्विन १६, शनिबार १२:३८:४०

मनिष डाँडीं याःगु छगू जक गोलया ग्वाहालिं नेपालं साफ च्याम्पियनसिपय् विजयी सुरुवात याःगु दु ।

शुक्रवाःनिसें माल्दिभ्सय् न्ह्याःगु साफ च्याम्पियनसिपया १३ क्वःगु संस्करणय् नेपालं थःगु न्हापांगु कासाय् माल्दिभ्सयात १–० गोल अन्तरं बुकूगु खः ।

६९ औं मिनेटय् नवयुग श्रेष्ठया थासय् मैदानय् दुहाँ वंम्ह डाँडीं ८६ औं मिनेटय् निर्णायक गोल याःगु खः ।

नेपाःया कप्तान व गोलकिपर किरणकुमार लिम्बुं छुं उत्कृष्ट बल बचाऊ याःबलय् माल्दिभ्स गोल यायेगुपाखें तापाःगु खः ।

साविक विजेता व घरेलु टोलीविरुद्ध त्याकेधुंकाः नेपालं स्वंगू ल्याः मुंकाः कासाय् सुखद् सुरुवात याःगु दु ।

नेपालं साफ च्याम्पियनसिपय् माल्दिभ्सविरुद्ध च्यागू कासा म्हितूबलय् न्हापांगु जित ल्हातय् लाकूगु खः । थ्वसिबेंया न्हयगू कासाय् नेपालं निगू कासा बराबरी म्हितेत ताःलाःबलय् न्यागू कासाय् पराजित जुइमाःगु खः ।

सन् २०१८ य् बंगलादेशय् जूगु लिपांगु साफय् नेपाः सेमिफाइनलय् माल्दिभ्सलिसे ३–० गोल अन्तरं पराजित जूगु खः । नेपालं उगु हारया ब्वलासा (बदला) तकं काःगु दु ।

न्यागू टिम सहभागी साफय् नेपालं आः निगूगु कासाय् श्रीलंकालिसे सोमवाः धेंधेंबल्ला याइ ।

Categorized in कासा