Mohanai 2078 KTM

साफ च्याम्पियनसिप : भारतं बुकल नेपाःयात

नेवा: अनलाइन न्युज – ललेन्द्र शाक्य | २०७८ आश्विन २५, सोमबार ११:५०:५८

आः नेपाःयात फाइनल थ्यंकेगु नितिं कम्ती नं बंगलादेशविरुद्ध बराबरी कासा म्हितेमालीगु जूगु दु...

माल्दिभ्सय् जुयाच्वंगु साफ च्याम्पियनसिप २०२१ स नेपाल न्हापांगुखुसि बुत । आइतवाः जूगु थःगु स्वक्वःगु कासाय् नेपाः भारतलिसे १–० गोल अन्तरं बूगु खः ।

थ्वसिबें न्ह्यः नेपालं मदिक्क निगू कासा त्याकूगु खः । भारतं धाःसा मदिक्क निगू कासा बराबरी म्हितूगु खः ।

माल्दिभ्सया राजधानी मालेय् च्वंगु नेशनल स्टेडियेमय् जूगु कासाय् भारतया नितिं कप्तान सुनिल क्षेत्रीं ८२ औं मिनेटय् गोल याःगु खः । न्हापांगु हाफय् नं सुनिल क्षेत्री व मनवीर सिंहं गोल यायेगु बांलाःगु ह्वताः गुमेयाःगु खः ।

नेपाः बुइधुंकाः न्यागू देय् सहभागी साफय् फाइनल थ्यनीगु समीकरण रोमाञ्चक जूगु दु । आः लिपांगु म्याच डे या दिं फाइनल थ्यनीगु निगू टिम सु जुइ सीदइ ।

नेपाः व माल्दिभ्सया समान ६ ल्याः जूगु दु । भारत ५ ल्याः मुंकाः स्वंगूगु थासय् दु । बंगलादेश स्वंगू कासापाखें ४ ल्याःलिसें प्यंगूगु थासय् दु । प्यंगुलिं कासा म्हितेधुंकूगु श्रीलंका धाःसा १ ल्याः मुंकाः पिहाँ वनेधुंकूगु दु । आः बुधवाः नेपालं बंगलादेशलिसे व भारतं माल्दिभ्सलिसे म्हिती ।

आः नेपाःयात फाइनल थ्यंकेगु नितिं कम्ती नं बंगलादेशविरुद्ध बराबरी कासा म्हितेमालीगु जूगु दु ।

Categorized in कासा