dudha jayanti 2568

सहकारी ठगी प्रकरणय् संसदीय छानविन समिति मदयेकूतलेतक कांग्रेस ब्याक जुइमखु : प्रकाशमान सिंह

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व चौथी (२०८० चैत्र ३० गते) शुक्रवाः

नेपाली कांग्रेसया पूर्वमहामन्त्री लिसें सांसद प्रकाशमान सिंह श्रेष्ठं सरकारं सहकारी ठगी प्रकरणय् संसदीय छानविन समिति मदयेकाः संसदीय अभ्यासयात हे प्रहार याःगुद्वपं ब्यूगु दु ।

सरकार व सरकारय् दुपिं मन्त्रीपिनिगु विषयस न्ह्यसः ब्वलनेधुंकाः संसदीय छानविन समिति दयेकेगु प्रचलन दूगु लुमंकूसें आः गृहमन्त्री रवि लामिछानेयात न्ह्यसः ब्वलनेधुंकाः कांग्रेसं संसदीय छानविन समितिया माग याःगु सांसद सिंहया धापू दु । तर, सरकारं उगु प्रकरणय् संसदीय छानविन समिति दयेके चाहेमजूगुलिं संसदया क्षेत्राधिकार दुने हे प्रहार जूगु सिंहया धापू दु ।

सिंहं सरकारया हुनिं लगानी सम्मेलनय् नं लिच्वः लाइगु टिप्पणी याःगु दु । सिंहं सरकारयात न्हापा देय् दुनेया राजनीतिक स्थायित्वया नितिं पहल यायेत सुझाव नं ब्यूगु दु ।

न्हूदँ २०८१ या लसताय् येँय् ग्वसाः ग्वःगु तुच्चा ज्याझ्वःयात सम्बोधन यासें सिंहं सरकारया आलोचना याःगु खः ।

नेता सिंहं धाःगु दु, “गुबलेतक सरकारं सहकारी ठगी प्रकरणय् संसदीय छानविन समिति दयेकी मखु, उबलेतक कांग्रेस थःगु मुद्दापाखें ब्याक जुइमखु ।”

सिंहं कांग्रेसया हुनिं मजूसे सरकारया हे रवैयाया हुनिं सदन अवरुद्ध जूगु विचाः प्वंकूगु दु ।

Categorized in राजनीति