prabhu baink new

सलिल सुन्दरं मां लुमंकाः यःमां... म्युजिक भिडियो पिथन (भिडियो)

नेवा: अनलाइन न्युज – ललेन्द्र शाक्य | २०७७ आश्विन १, बिहिबार १६:३६:०४

म्येहालामि सलिल सुन्दर तुलाधरया ...यः मां... बोलया म्ये सार्वजनिक जुल

म्येहालामि सलिल सुन्दर तुलाधरया नेपालभाषाया म्ये ...यःमां... बोलया म्युजिक भिडियो सार्वजनिक जूगु दु ।

म्येहालामि तुलाधरं थः मदुम्ह मां रुपशोभा तुलाधरयात दोहलपाः (समर्पण) यानाः सिर्जना याःगु यःमां...म्येया म्यूजिक भिडियो हार्इलाइट्स नेपालया युट्युब च्यानलपाखें सार्वजनिक जूगु खः ।

म्येहालामि तुलाधरं मदुम्ह मां मदूगु ४५ न्हुया पुण्य तिथिस संगीतवद्ध यायेगुलिसें रेकर्ड याःगु खःसा म्येयागु म्युजिक भिडियो दछिया पूण्य तिथिया दिं लाकाः सार्वजनिक याःगु खः ।

सार्वजनिक जूगु यःमां...म्यूजिक भिडियो दुने मन्जु श्रेष्ठ, दिपक मगर व सर्निका राजोपाध्यायं अभिनय यानातःगु दु ।

मतिना प्रोडक्सनं तयार याःगु म्यूजिक भिडियोया निर्देशन नांजाःम्ह म्यूजिक भिडियो निर्देशक विजु कर्माचार्यं यानातःगु दु । छायांकन अमर चित्रकारं याःगु खःसा सह निर्देशन व भिएफएक्स महेश्वर श्रेष्ठं यानातःगु दु ।

मांया गुण चित्रण यानाः संसारय् न्ह्याम्हेसित नं दक्कले माया याइम्ह देवी समानया मांया वियोग गुलि दुःखदायी जुइ धैगु भावना कःघानाः तयार यानातःगु यःमां...म्येया सार खः ।

म्येया संगीत संयोजन अन्जन श्रेष्ठं यानातःगु दुसा रणबहादुर ताम्राकारं म्ये च्वज्याय् ग्वाहालि याःगु दु धकाः म्येहालामि सलिल सुन्दर तुलाधरं जानकारी ब्यूगु दु ।

थुगु म्येया म्येहालामिलिसें लय्चिनाम व च्वमि सलिल सुन्दर तुलाधरं थ्वयां न्ह्यः नं नेपाली संगीत लागाय् ड्याम ड्याम... थें जाःगु लोकंह्वाःगु म्ये बियादीधुंकूगु दुसा नेपाली संकिपा ...निजर्ला...य् भाले मोटर, चोखो मायामा तिमी नै हौ...थें जाःगु म्ये नं हालादीगु दु ।

अथेहे नेपालभाषा संगीतय् छपलाः एल्बम, मखं त्वाःया कायमचा नापं मेमेगु नं लोकंह्वाःगु म्ये हालादी धुंकुगु दु म्येहालामि सलिल सुन्दर तुलाधरं।

(थन क्लीक यानाः म्युजिक भिडियो स्वयादिसँ)

Categorized in कला