newayatataad 2

सर्वोच्चं सिद्धबाबायात थुनाय् तयेत आदेश

नेवा: अनलाइन न्युज – ललेन्द्र शाक्य | २०७७ मङ्सिर १४, आइतबार १६:२०:४२

सर्वोच्च अदालतं बलात्कार द्वपं लाःम्ह सिद्धबाबा धकाः म्हस्यूम्ह कृष्णदास गिरीयात थुनाय् हे तयेत आदेश ब्यूगु दु ।

छम्ह अनुयायीयात बलात्कार याःगु द्वपनय् जिल्ला अदालत सुनसरीं सिद्धबाबायात २०७६ माघ ९ गते धरौटीइ त्वःतेत आदेश ब्यूगु खः । वविरुद्ध जिल्ला सरकारी वकिल ज्याकुथिं याःगु पुनरावेदनय् उच्च अदालत विराटनगरं थुनाय् तयेत आदेश ब्यूगु खः ।

सिद्धबाबां उगु आदेश बेरीतया जूगु धासें सर्वोच्च अदालतय् निवेदन ब्यूगु खः । तर वंगु शुक्रवाः न्यायाधीश डा. आनन्दमोहन भट्टराई व प्रकाशकुमार ढुंगानाया मंकाः इजलासं उच्च अदालतया आदेश बेरीतया खनेमदूगु धासें सिद्धबाबायात थुनाय् हे तयेत आदेश ब्यूगु खः ।

आदेशय् धयातःगु दु, मिसिल स्वयेबलय् पीडितया किटानी जाहेरीया अतिरिक्त निजं मौकाय् याःगु भ्वँ, वरदात जूगु धाःगु ई, उकिया न्ह्यःने ल्यूने पीडित प्रतिवादीया आश्रमय् हे दूगु तथ्य, पीडित व प्रतिवादी दथुइ जूगु मोबाइलया मेसेजपाखें खनेदूगु सामिप्यता, अडियो मेसेजया प्रमाणिकता प्राविधिक जाँचपाखें पुष्टि जूगु अवस्था लिसेंया तत्काल प्राप्त प्रमाणया आधारय् निज आः हे निर्दोष जू धाये मफुत ।

Categorized in दुर्घटना-अपराध