ad prabhu

सरकार हाकनं गुथि विधेयक हयेत तयार जुयाच्वंगु दु : मन्त्री अर्याल

नेवा: अनलाइन न्युज – ललेन्द्र शाक्य | २०७७ आषाढ १५, सोमबार १२:२२:४०

भूमि व्यवस्था, सहकार िव गरिवी निवारण मन्त्री पद्माकुमारी अर्यालं गुथि विधेयक सरकारं हाकनं हयेत तयारी जुयाच्वंगु जानकारी ब्यूगु दु । राष्ट्रिय सभाया राष्ट्यि सरोकार व समन्वय समिति पशुपति क्षेत्र विकास कोष अध्ययन अनुगमन समितिं तयार याःगु मस्यौदा अध्ययन प्रतिवेदनयात कयाः समितिं थौं याःगु सहलह ज्याझ्वलय् न्वःवासें मन्त्री अर्यालं गुथि विधेयक सरकारं हाकनं हयेत्यंगु जानकारी ब्यूगु खः ।

गुथिया जग्गात राज्यं नं नियन्त्रण याये मफयाच्वंगु धासें मन्त्री अर्यालं थः मन्त्रालयस वयेधुंकाः संरक्षणया नितिं जुयाच्वनागु धाःगु दु । गुथि संरक्षण यायेगु नितिं हे सरकारं गुथि विधेयक हःगु खँ दोहोरेयासें व आः फिर्ता जूसां नं हाकनं हयेगु तयारीइ सरकार जुयाच्वंगु धाःगु दु ।

गुथिइ राज्यं तप्यंक हस्तक्षेप यानाः छ्यलाबुला यायेदइगु कथंया व्यवस्था नं मजूगु धासें मन्त्री अर्यालं गुथि ब्यागलं प्रकृतिया मौलिक विषय जूगुलिं थुकियात ब्यागलं ढंगं हे व्यवस्थित यायेमाःगु धाःगु दु ।

पूर्खापिन्सं परोपकारी भावनाया लिसें गुथिइ जग्गा दान याःगु धासें पूर्खां याःगु दान आः थीथी मनुखं खोसेयायेगु, अतिक्रमण यायेगु, थःगु यायेगु ज्या जुयाच्वंगु दावी याःगु दु ।

मन्त्री अर्यालं धाःगु दु, गुगु परोपकारी भावनाया लिसें धार्मिक आज्जुं पूर्खापिन्सं दान यात, उकिया संरक्षण यायेगु ज्याय् पलाः न्ह्याकेमाः धकाः जिपिं जुयाच्वनागु दु । सरकारी, सार्वजनिक, गुथिया जग्गा संरक्षण यायेगु नितिं मन्त्रालयं जाँचबुझ आयोग दयेकाः आः ज्या जुयाच्वंगु दु ।

गुथिया जग्गालिसें स्वानाच्वंगु मोहीपिनिगु हक स्थापित यायेमाःगु धासें मन्त्री अर्यालं मर्काइ् लाःपिं किसानपिन्त न्याय बिइमाःगु तःधंगु जिम्मेवारी जूगु, धर्म संस्कृतिया रक्षा यायेगु, गुथिया जग्गाया संरक्षण यायेगु व गुथिया जग्गालिसे स्वानाच्वंपिं किसानपिनिगु हकयात स्थापित यायेगु खँयात व्यवस्थित यायेगु खँ दु, उगु स्वंगुलिं खँयात व्यवस्थित यायेगु कार्ययोजना लिसें जिमिसं गुथि विधेयक हयागु खः तर व फिर्ता कायेमाल ।

गुथि विधेयक रोक्का जूगु सकसिनं स्यू, तर जिमिसं हाकनं हये धकाः मन्त्री अर्यालं धासें मन्त्रालय एकीकृत भूमि ऐन हयेत समिति दयेकाः ज्या न्ह्यःने यंकाःगु व उकी थ्व भूमि ऐन नं दुथ्याकेगु जुइ धकाः धाःगु दु ।

कार्यक्षेत्रयात व्यवस्थित यायेगु कथं कानूनत मवःतले तक थ्व समस्या जुयाच्वनीगु मन्त्री अर्यालया धापू दु । मन्त्री अर्यालं धाःगु दु, जिमिगु अधिकार क्षेत्र छु खः धैगु प्रष्ट रुपं कानूनी व्यवस्था मयात धाःसा तःधंगु लडाइँ जुइ । सम्पत्ति दु, मेगु स्रोतत दु, पूजापाठ जुइ, भेटी चढेयाइ । थ्व खँपाखें समस्या ब्वलंगु दु ।

पर्यटन क्षेत्रं छु यायेगु ? गुथिं छु यायेगु धकाः क्षेत्राधिकार प्रष्ट रुपं किटान यानाः वनेमाःगु मन्त्री अर्यालया धापू खः । अन्तरविरोधी कथंया कानून जूगु हुनिं विवाद ब्वलंकूगु धासें मन्त्री अर्यालं गुबलेतक दोहोरो स्वामित्व दइ उबलेतक गुथिइ तःधंगु समस्या जुयाच्वनी ।

गुथिइ आपालं कथंया भावना ल्वाकज्यानाच्वंगु दु । आः जिमिसं ठ्याक्क हे अथे या धकाः धाःसां नं मज्यूगु जुयाच्वन । आःया विवाद धयागु स्वामित्व व स्रोत परिचालनलिसे स्वानाच्वंगु धासें स्रोत परिचालन सुनां छु यायेगु धकाः स्पष्ट जुइमाःगु धाःगु दु ।

मन्त्री अर्यालं थः समस्याया चांगय् लानाच्वंगु धासें देय् न्यंकं २ हजारसिबें अप्वः गुथि दु । स्वनिगः दुने जक ५०० गू गुथि दु ।

सहकारीपाखे ३५ हजारसिबें अप्वः सहकारी दु । सरकारी, सार्वजनिक जग्गाया हालखबर दूगु जानकारी नं मन्त्री अर्यालं ब्यूगु दु । वं धाःगु दु, मालपोत नापीया हालखबर नं थथे हे दु, जि ला अतिकं तःधंगु समस्यै समस्याया चांगय्, बेथितिया द्वँय् लानाच्वंगु दु । गुलि सुधार यायेफइ सुधार यायेगुलि जुयाच्वनागु दु । समस्यां घेरे जुयाः वयाच्वनासां नं सुधार यायेगु नितिं आत्मविश्वासया लिसें जुयाच्वनागु  मन्त्री अर्यालं धाःगु दु ।

Categorized in राजनीति