kmc bidya

सरकार ! सिरपाः गुबले बिइगु ?

नेवा: अनलाइन न्युज | २०७६ फाल्गुण १६, शुक्रबार १३:४३:४३

१३ औं दक्षिण एसियाली खेलकुद (साग) क्वचाःगु स्वला दइन । साग क्वचायेखतं हे मंसीर २५ गते प्रधानमन्त्री केपी शर्मा ओलीं कासामिपिन्त सरकारी निवास बालुवाटारय् सःताः लच्छिया दुने नगद सिरपाः बिइगु घोषणा याःगु खः । तर, कासामिपिन्सं आःतकं सिरपाः कायेखंगु मदुनि ।

सागया पदक विजेतापिन्सं थ्वसिबें न्ह्यः कयाः वयाच्वंगु नगद सिरपाःसिबें प्रधानमन्त्री ओलीं अप्वः घोषणा यायेधुंकाः खेदकुद सिरपाः व सम्मान कार्यविधि हे संशोधन यायेमाःगु बाध्यता जुल ।

बिहिवाः च्वंगु मन्त्रिपरिषद् बैठकं कार्यविधि संशोधन प्रस्ताव पारित याःगु दु । न्हूगु कार्यविधिइ सिरपाःया निति. सिफारिस समिति नीस्वनेमाःगु व समिति नीस्वंगु स्वलाया दुने सिफारिस यायेमाःगु व्यवस्था दूगुलिं कासामिपिन्सं सिरपाः कायेत छुं ई पिइमालीगु जूगु दु ।

सिफारिस समिति नीस्वंगु मदुनि । समिति युवा तथा खेलकुद मन्त्रालयया सचिवया संयोजकत्वय् नीस्वनेमाःगु प्रावधान दु । वंगु मंसीर १४ गतेनिसें २४ गतेतक घरेलु भूमिइ क्वचाःगु सागय् नेपालं ५१ स्वर्ण, ६० रजत व ९५ काँस्य पदक त्याकाः पदक धलखय् निगूगु थासय् च्वनेत ताःलाःगु खः ।

प्रधानमन्त्री ओलीं निगूसिबें अप्वः स्वर्ण त्याकूपिन्त ११ लख, छगू स्वर्ण त्याकूपिन्त ९ लख, रजत पदक त्याकूपिन्त ६ लख व काँस्य पदक त्याकूपिन्त ३ लख बिइगु घोषणा याःगु खः ।

व्यक्तिगत स्पर्धाया स्वर्ण विजेतापिन्त सिरपाः घोषणा याःसां नं टिम इभेन्टया विजेता कासामिया सिरपाः घोषणा धाःसा याःगु मदुनि । टिम इभेन्टया कासामिपिनिगु दथुइ गुलि सिरपाः दइ धैगु अन्यौलय् लानाच्वंगु दु ।

१३ क्वःगु सागय् दोहोरो स्वर्ण विजेता कराँते कासामि मन्डेकाजी श्रेष्ठं सरकार थःम्हेस्यां घोषणा याःगु सिरपाः मब्यूबलय् म्हाइपुसे च्वनाच्वंगु धाःगु दु । वं धाःगु दु, “जिमिसं देशया प्रतिष्ठाया नितिं चाःन्हि मधाःसे मेहनत याना । सरकारं कासामिपिन्त आश्वासन जक ब्यूगु दु ।” श्रेष्ठं न्हियान्हिथं मेपिं कासामिपिन्सं सिरपाःया विषयस न्यनीगु यानाच्वंगु नं धाःगु दु ।

सिनियर कासामि जूगुलिं आपालं पासापिं सिरपाः गुबले बिइ धकाः न्यनीगु धासें मण्डेकाजी श्रेष्ठं धाःगु दु, “याकनं हे कायेखनी धकाः आश्वासन बियाच्वनागु दु ।”

अथेहे, राष्ट्रिय भलिबल कासामि रेश्मा भण्डारीं सिरपाः गुबले कायेखनीगु सिबें न. टिम गेमया कासामिपिन्सं गुलि सिरपाः कायेखनी धैगु च्यूताः कयाच्वंगु धाःगु दु ।

रेश्मां धाःगु दु, “जिमिसं गुलि सिरपाः कायेखनीगु धैगुलि अन्यौल दु । थःगु हे देशय् बांलाःगु लिच्वः हयाबलय् थप हौसला अप्वयेकेमाःगुलि हतोत्साहित यायेगु ज्या जूगु दु ।”

रेश्मां सरकार थःम्हेस्यां हे घोषणा याःगु सिरपाः कायेत नं ताःहाकःगु ई पिइमाःबलय् दुःख जूगु धाःगु दु । मिसा भलिबलय् रजन पदक त्याकूगु पुचःया दुजः रेश्मां धाःगु दु, “सरकारं बिइगु सिरपाःपाखें पासापिन्सं छु छु याये धैगु म्हगस खंकूगु जुइ । सरकारं इमिगु म्हगसय् नं तुषारापात यानाब्यूगु दु ।” रेश्मां सरकारं न्हापां सम्मान यायेमाः धकाः मेमेगु आपालं निकाय व संघसंस्था पियाच्वंगु खँया जानकारी नं ब्यूगु दु ।्

(अन्नपूर्ण पोष्ट न्हिपौपाखें)

Categorized in पत्रपत्रिका