nepal investment baink

सरकार ! तरकारीया मू तेब्बर छाय् ?

नेवा: अनलाइन न्युज – ललेन्द्र शाक्य | २०७६ चैत्र १३, बिहिबार १९:०३:३५

सचेत नागरिकपिन्त सरकारयात न्ह्यसःचिं थंगु दु, ‘सरकार, लकडाउन जक यानाः सरकारया दायित्व व कर्तव्य पूवनी मखु, बजाः भाःया नं ब्यवस्था व अनुगमन यानाः सर्वसाधारणया सेवा यायेगु पलाः नं न्ह्याकेमाः यदि सरकार जनताया सरकार खःसा ।’ सर्वसाधारणपिन्त अथे थिकेजूगु तरकारी हे छाय् नयेमाःगु धकाः न्ह्यसः तसें छुं दिं उगु तरकारी मनयां छुं जुइमखु व थिकेजूगु तरकारी सकल सर्वसाधारणपिन्सं बहिष्कार यानाः छुं दिं दूदूगु नये धकाः इनाप याःगु दु ।

‘सरकारं नेपाल बन्द ला याःगु मखुनि, कर्फ्यू ला लगे याःगु मखुनि, कोरोना भाइरस संक्रमणपाखें बचेजुइत लक डाउन जक याःगु खःनि । तर, तरकारीया मू तेब्बर छाय् सरकार ?’ धकाः सचेत नागरिकपिन्सं न्ह्यसः तःगु दु । सचेत नागरिकपिन्सं थ्व सरकार जनताया सरकार खःकि मखु धकाः नं च्यूताः प्वंकूगु दु ।

लक डाउन न्ह्यः उपभोक्तापिन्सं गोलभेडा प्रतिकेजी ४० तका दामं कयाच्वंगु खः । तर आः उपभोक्तां १२० तका दामं न्यायेमाःगु अवस्था थ्यंगु दु ।

कालिमाति तरकारी व फलफूल बजार विकास बोर्डं क्वःछूगु खुद्रा मू हे ९० तका खः । व्यवसायीं जोखिमय् पलाः न्ह्याकाः सामान हयेमाःगु धासें प्रतिकेजी १२० तका दांसिबें अप्वः दां कयाः मिइगु यानाच्वंगु दु ।

गोलभेडा जक मजुसे प्याज, आलु लिसेलिसें मेमेगु तरकारीया मू नं थिकेजूगु दु । सरकारया मन्त्री कालोबजारी याइपिन्त कारवाही याये धकाः मिडियो ख्वाः ब्वयाच्वंगु दु तर उपभोक्ता दोब्वर तेब्बर मू पुलाः सामान न्यायेत बाध्य जुयाच्वंगु दु । गुकिया हुनिं सर्वसाधारणया भुतू थिकेजूगु दु ।

थौं बिहिवाः कालिमाति बजारय् तग्वःगु गोलभेडाया मू प्रतिकेजी ९० तकां म्यूगु दु । चीग्वःगु गोलभेडा प्रतिकेजी १०५ तका, भुति प्रतिकेजी १४५ तका, मटरकोसा प्रतिकेजी ८५ तका दामं मियगु यानाच्व.गु कालिमाति फलफूल व तरकारी बजारं जानकारी ब्यूगु दु ।

अथेहे, खाइककःचा प्रतिकेजी १५५ तका, लौका प्रतिकेजी ९५ तका, परवर प्रतिकेजी १५५ तका व वाउँगु फःसि प्रतिकेजी ५५ तका खुद्रा दामं मियाच्वंगु कालिमाति बजारं जानकारी ब्यूगु दु । तर, मेमेपिं विक्रेतातक थ्यंबलय् थुकिया मूसिबें अप्वः हे पुलेमाःगु बाध्यता सर्वसाधारणयात जूगु दु ।

कालिमातिं मेमेगु थासय् तरकारी थ्यंबलय् क्वःछ्यूगु खुद्रा मूसिबें अतिकं अप्वः दां पुलेमाःगु बाध्यता सर्वसाधारणयात जूगु दु । थुकिं सर्वसाधारण उपभोक्ता पिन्त आर्थिक संकट लानाच्वंगु अवस्था ब्वलंगु दु ।

सचेत नागरिकपिन्त सरकारयात न्ह्यसःचिं थंगु दु, ‘सरकार, लकडाउन जक यानाः सरकारया दायित्व व कर्तव्य पूवनी मखु, बजाः भाःया नं ब्यवस्था व अनुगमन यानाः सर्वसाधारणया सेवा यायेगु पलाः नं न्ह्याकेमाः यदि सरकार जनताया सरकार खःसा ।’

अथेहे, सचेत नागरिकपिन्सं सर्वसाधारणपिन्त अथे थिकेजूगु तरकारी हे छाय् नयेमाःगु धकाः न्ह्यसः तसें छुं दिं उगु तरकारी मनयां छुं जुइमखु व थिकेजूगु तरकारी सकल सर्वसाधारणपिन्सं बहिष्कार यानाः छुं दिं दूदूगु नये धकाः इनाप याःगु दु ।

Categorized in बजाः