नेवा: अनलाइन न्युज – ललेन्द्र शाक्य | २०७७ जेठ १७, शनिबार १२:५०:३४

सत्तारुढ नेपाल कम्युनिष्ट पार्टी दुने हाकनं न्हूगु विवाद पिहाँ वःगु दु । सरकारं न्ह्यब्वःगु वइगु आर्थिक दँया बजेटय् अमेरिकी च्यालेञ्ज कर्पोरेशन (एमसीसी)या विषय दुथ्याकेधुंकाः विवाद पिहाँवःगु खः ।

बजेटय् एमसीसी दुथ्याकेधुंकाः म्हिगः शुक्रवाः न्हिनय् नेकपाया अध्यक्ष तकं जुयाच्वंम्ह प्रधानमन्त्री केपी शर्मा ओली इतरया नेतापिन्सं जुम बैठक याःगु खः । विश्वस्त स्रोतया कथं न्वकू बामदेवव गौतमं जुम बैठकया व्यवस्था याःगु खः । गौतमलिसें नायः पुष्पकमल दाहाल प्रचण्ड, बरिष्ठ नेतापिं झलनाथ खनाल व माधवकुमार नेपालया लिसेलिसें प्रवक्ता नारायणकाजी श्रेष्ठ जुम बैठकय् सहभागी जूगु खः । इमिसं सरकारया कार्यशैलीया समीक्षा याःगु सीदूगु दु ।

सरकारं हःगु राजनीतिक दल व संवैधानिक परिषद सम्बन्धी अध्यादेशया इलय् ओलीविरुद्ध दयेकूगु गुट हाकनं दनावःगु दु । सचिवालयया थुपिं हे न्याम्ह नेता उगु इलय् ओली चिइकेगु तकया निर्णयस थ्यंकूसां नं थःथवय् मतदेया हुनिं असफल जूगु खः ।

बमदेव गौतमयात प्रधानमन्त्री दयेकेगु प्रस्ताव हयाः ओलीं गुट तितरवितर याःगु खः । तर, ओलीया कार्यशैलीप्रति स्वयं गौतम अतिकं असन्तुष्ट जुइधुंकाः आः धाःसा तितरवितर मजुइगु कथं एकता यानाः वनेनु धासें न्याम्ह नेतापिनिगु बैठक च्वंगु खः ।

एमसीसीबारे ओली इतरया नेतापिं विरोधय् दु । इमिसं संसदं एमसीसी पारितत यायेत छुं विषयस संशोधन जुइमाःगु अडान तःगु दु । तर, थ्वहे विषय बजेटय् दुथ्याकेधुंकाः बजेट हे पारित जुयके मबियगु कथं नेकपाया ओली इतरया नेतापिं सक्रिय जूगु दु ।

आः न्ह्याःगु सचिवालय बैठकय् एमसीसी बजेटय् दुथ्याकूगु विषयया लिसेलिसें नक्सा संसदय् सहलहया नितिं पेस यायेत याःगु ढिलाई लकडाउनया समीक्षा लिसेंया सहलह जुइगु सीदूगु दु ।
थौं ओलीयात व इतरया नेतापिं आक्रामक ढंगं प्रस्तुत जुइगु तयारीया लिसें बालुवाटार थ्यंकूगु दु ।

विश्वस्त स्रोतया कथं ओली इतरया नेतापिन्सं सरकार क्वःथलेत हाकनं न्हूगु अस्त्र तयार याःगु दु । थुगुखुसिया अस्त्र एमसीसी लिसेंया जुइगु सीदूगु दु । ओली सरकारयात छक्वलं यक्व अस्त्र प्रहार यायेगु कथं नेकपा दुनेया ओली इतरया गुट पूर्ण तयारीया लिसें न्ह्यःने वंगु दु ।

Categorized in राजनीति