नेवा: अनलाइन न्युज – ललेन्द्र शाक्य | २०७९ फाल्गुण ८, सोमबार १६:०५:२४

नेपाल सरकारं गुण एयरलाइन्सया फुक्क विमान उडान बन्द यायेगु निर्णय याःगु दु । गुणया न्हयगः विमानं सोमवाःनिसें हे उडान यायेमखंगु खः ।

कर्मचारीपिन्त तलब तकं बिइमफूगुलिं हवाई सुरक्षा पक्षय् लिच्वः लाइगु जोखिम दूगु ठहर यासें नेपाल नागरिक उड्डयन प्राधिकरणं गुणया विमानयात ब्वयेके मबिइगु निर्णय याःगु दु ।

प्राधिकरणया प्रवक्ता जगन्नाथ निरौलाया कथं कम्पनीं कर्मचारीया सेवा सुविधा इलय् हे बिइफयाच्वंगु मदु । आर्थिक संकटपाखें ल्वानाच्वंगु कम्पनीं सेवा बिइबलय् कर्मचारीया मनोविज्ञान सुरक्षामैत्री जुइमफइगु खनेदूगुलिं उडान बन्द यानागु निरौलां धाःगु दु ।

प्रवक्ता निरौलां धाःगु दु, ‘तलब कायेमखंपिं कर्मचारीं बांलाक्क ज्या मयायेफु, तलब तकं कायेमखंगु मनोविज्ञान दूगु अवस्थाय् हवाई सुरक्षाय् जोखिम अप्वयेफु । उकिं हे यानाः आःयात उडान याकेमबिइगु निर्णय यानागु खः ।’

सिम्रिक एयरलाइन्सया विमानत न्यानाः गुण एयरलाइन्सं हवाई सेवा बियाः वयाच्वंगु खः । आर्थिक संकटया हुनिं कम्पनीं थीथी पक्षयात पुलेमाःगु दायित्व नं अप्वःगु सुचं प्राधिकरणय् थ्यंगु दु ।

Categorized in लजगाः