zero media family planning adv

सरकारं यायेधुंकूगु निर्णय लितकाल, कन्हय् व कंस स्वनिगः पिने मछ्वइगु जुल !

नेवा: अनलाइन न्युज – ललेन्द्र शाक्य | २०७६ चैत्र २७, बिहिबार १८:४६:४६

  • ‘स्वनिगलं गामय् छ्वयेत गृहकार्य यायेगु नितिं सरकारं गृह मन्त्रालययात नं धायेधुंकूगु खः’
  • ‘स्वनिगःपाखें गामय् छ्वयेगु खःसा लकडाउनया छु अर्थ जुल ?’ – प्रदेश ५ मुख्यमन्त्री शंकर पोखरेल
  • ‘आःयात थ्व सम्भव मजुल धकाः थुइकेमाल’ – भौतिक पूर्वाधार व यातायातमन्त्री बसन्तकुमार नेम्वाङ

लकडाउनया हुनिं अलपत्रय् लाःपिन्त कन्हय् चैत्र २८ व कंस २९ गते निन्हुयंकं स्वनिगः पिने गामय् छ्वयेगु निर्णयपाखें सरकार लिच्यूगु दु । प्रदेश सरकारतसें विरोध यायेधुंकाः संघीय सरकार थःम्ह याःगु निर्णयपाखें निघौ हे टिके जुइमफुत । आखिरय् यायेधुंकूगु निर्णय सरकारं वाध्य जुयाः लितकाये माल ।

नेपाल सरकारया उपप्रधान लिसें रक्षामन्त्री ईश्वर पोखरेलया नेतृत्वय् च्वंगु सरोकारवाला मन्त्रालयया बैठकं स्वनिगलय् च्वनाच्वंपिं स्वनिगःपिनेया गामय् च्वपिन्त कन्हय् शुक्रवाः व कंस शनिवाः निन्हु थःथःगु गामय् छ्वयेगु निर्णय याःगु खः । व, गृहकार्य यायेत गृह मन्त्रालययात नं धायेधुंकूगु खः ।

तर प्रदेश सरकारतसें विरोध याःगु खःसा ५ नम्बर प्रदेशया मुख्यमन्त्री शंकर पोखरेलं स्वनिगःपाखें पिने छ्वयेगु खःसा लकडाउनया अर्थ मजुइगु धासें विरोध याःगु खः ।

गृह मन्त्रालयं नं कन्हय् शुक्रवाः व कंस शनिवाः हे छ्वयेगु सम्भव मजूगु सल्लाह बिइधुंकाः निर्णय उल्टे जूगु खः । भौतिक पूर्वाधार व यातायातमन्त्री बसन्तकुमार नेम्वाङं धाःगु दु, “आःयात थ्व सम्भव मजुल धकाः थुइकेमाल ।”

Categorized in राजनीति