2565 buddha Jayanti ADV

सरकारं क्वःछित रेम्डिसिभिरया मू : प्रति भाइल ४९०० तका

नेवा: अनलाइन न्युज – ललेन्द्र शाक्य | २०७८ बैशाख २९, बुधबार १६:५१:२५

सरकारं कोरोना संक्रमित ल्वगिपिनिगु नितिं छ्यलीगु वासः रेम्डिसिभिरया मू क्वःछ्यूगु दु । स्वास्थ्य व जनसंख्या मन्त्रालयया सहप्रवक्ता डा. समीरकुमार अधिकारीं थौं बुधवाः छगू विज्ञप्ति सार्वजनिक यासें प्रति भाइल ४ हजार ९०० तका दां रेम्डिसिभिर खरिद यायेफइगु जानकारी ब्यूगु दु ।

कोभिड १९ या वासः यायेगु झ्वलय् अस्पतालपाखें चिकित्सकपिन्सं रेम्डिसिभिर वासः सिफारिस याःसा आधिकारित आयातकर्ता आयन हेल्थकेयरं हःगु रेम्डिसिभिर जक छ्यलेत जक मन्त्रालयं धाःगु दु ।

मन्त्रालयया कथं रेम्डिसिभिर काःवनीम्ह मनुखं थःगु म्हसीका पौया प्रमाणलिसें सम्बन्धित कोभिड अस्पताल वा उगु अस्पतालय् वासः याकाच्वंम्ह संक्रमितया नितिं सम्बन्धित चिकित्सकया प्रिस्क्रिप्सन कयाः वनेमालीगु जूगु दु ।

वासः व्यवस्थापन विभागया कथं आधिकारिक आयातकर्ता आयन हेल्थकेयरं बैशाख २१ गते बंगलादेशपाखें ३००० भाइल रेम्डिसिभिर आयात याःगु खः ।

Categorized in बजाः