city axpris 2

समावेशी संगीत सिरपाः निम अवार्डय् नेपालभाषा विधा

नेवा: अनलाइन न्युज – विजयरत्न | ने.सं. ११४४ पोहेलागा त्रयोदसी

पावर ईन्टरनेशनल मिडिया नेपाल (पिम नेपाल)या ग्वसालय् जुइत्यंगु न्हयक्वःगु संस्करणया राष्ट्रिय समावेशी म्यूजिक अवार्ड (निम अवार्ड) २०२४ या मनोनयन सार्वजनिक याःगु दु ।

न्हयदँ न्ह्यःनिसें पूर्व–मेची व पश्चिम–महाकालीतक देसय् व देसं पिने च्वनाः नेपालय् ल्हाइगु थीथी भाषाया म्ये व म्यूजिक भिडियोत दुथ्याकाः थुगु अवार्ड न्ह्याकाः च्वंनागु खँ ग्वसाः खलःया माधवराज खरेलं धयादीगु दु ।

नेपाःया दक्वं भाय् राष्ट्रिय भाषा खः धैगु तातुनाः न्ह्याकाच्वंगु थुगु अवार्डय् थीथी भाषाया अवार्ड यानाः थुगुसी मुक्कं पीछगू (४१) विधा दुथ्याकातःगु दु । कलाकार, श्रष्टा व सर्जकपिंत अनलाईन भोटिङ प्रकृया व निर्णायकपिनिगु मतया आधारय् सर्वोत्कृष्ट घोषणा यानाः अवार्ड लःल्हायेगु जुइ धकाः निम अवार्डया ज्याझ्वः संयोजक कमला जोशीं कनादीगु दु ।

थुगुसीया निम अवार्डय् नेपालभाषाया मुक्कं प्यंगू विधा दुथ्याकातःगु दु । थुकीमध्ये नेपालभाषाया म्ये च्वमि, नेपालभाषाया संगीतकार, नेपालभाषा गायन व नेपालभाषा भिडियो दुथ्याकातःगु खः ।

मैथली व भोजपुरी म्ये यानाः स्वंगू विधा दुथ्याकातःगु दुसा ल्यंदुगु नेपाली भाषाया म्ये दुथ्यानाच्वंगु दु ।

नेपालभाषाया म्येच्वमि कथं रामकृष्ण दुवाल (जिगु देय् जितः यः), सुन्दरमान श्रेष्ठ (माया मतिना जक मखु), नातिकाजी महर्जन (बांलाः आपालं), केशव महर्जन (वा जिन्दगीया पासा), वंशीधर बज्राचार्य (असं बजारय् मंगः बजारय्) दुथ्यानाच्वंगु दु ।

नेपालभाषाया संगीतकार कथं मनराजा नकःमि (असं बजारय् मंगः बजारय्), रामकृष्ण दुवाल (जिगु देय् जितः यः), सुन्दर ब्याँजु (जिमि बाज्या), नील शाक्य (जोवन जिगु चुलि) व दीप तुलाधर (छंगु नुगलय्) दुथ्यानाच्वंगु दु ।

नेपालभाषा गायनय् मोहन शाक्य (असं बजारय् मंगः बजारय्), शुद्धलक्ष्मी श्रेष्ठ (योम्ह छन्त मनया खँ), एन्जिला सिंह श्रेष्ठ (जोवन जिगु चुली), सुन्दर ब्याँजु (जिमि बाज्या) व सरस्वती मानन्धर (छंगु नुगलय्) दुथ्यानाच्वंगु दु ।

नेपालभाषा भिडियो कथं विश्वास बज्राचार्य (असं बजारय् मंगः बजारय्), रोहिया महर्जन (चकना ओ चकना), दर्शनवीर शाक्य (जिगु देय् जितः यः), बाबुकाजी जल्मी (वा जिन्दगीया पासा) व रामकृष्ण खड्गी (ज्वरा ज्वरा पर्सि) म्ये दुथ्यानाच्वंगु दु ।

थ्व बाहेक नं ‘जिगु देय् जितः यः’ म्येया छायाँकन यानादीम्ह मनोजरत्न शाही समग्र नेपाली म्यूजिक भिडियोया छायाँकनया नामांकनय् दुथ्यानाच्वंगु दु । उत्कृष्ट छायाँकार विधाय् नवराज उप्रेती (मूड फ्रेस), विरेन्द्र भट्ट (मेरो लाहुरे), मनोजरत्न शाही (जिगु देय् जितः यः), चक्र बहादुर बराल (ओ लभ्ली) व मुकेश हुमागाई (तिम्रो याद) दुथ्यानाच्वंगु दु ।

अथेहतुं अनिल तुलाधर नं उत्कृष्ट संगीत संयोजक कथं ‘न्याकुँ कयाः वल छ’ म्येपाखें नामंकनय् दुथ्यानाच्वंगु दु । उत्कृष्ट म्युजिक एरेन्जर विधाय् कुमार राना मगर (मैले दिएको चोखो माय), राकेश सोनी )टिपौ त भिरेमा), अशोक राई (म हार्दै थिएँ), सुदिप सागर (सकम्बरी) व अनिल तुलाधर (न्याकुं कया वल छ) दुथ्यानाच्वंगु दु ।

नेपालभाषाया निम्ह लोकंह्वाःपिं म्ये हालामिपिं रोजी डंगोल श्रेष्ठ उत्कृष्ट राष्ट्रिय भाव म्येय् ‘मेरो मातृभूमि’ पाखें दुथ्यानाच्वंगु दुसा शुद्धलक्ष्मी श्रेष्ठ ‘आँखैमा गाजलु’ म्येपाखें उत्कृष्ट लोकदोहरी गायिका विधाय् नामंकन जुयाच्वंगु दु ।

थुगु ज्याझ्वः छगू समारोह यानाः फाल्गुन महिनाया अन्तिम वाःपाखे यायेगु खँ ग्वसाःखलकं जानकारी ब्यूगु दु । ज्याझ्वलय् रजत सम्मान, पत्रकारिता पुरस्कार लिसें थीथी सम्मान व पुरस्कार नं लःल्हाइगु खँ ग्वसाःखलकं जानकारी बिउगु दु ।

थुगुसिइ  निम अवार्डया निंतिं aventoz.com मार्फत अनलाइन भोटिङ नं खुल्ला याःगु दु । थुगु ज्याझ्वःया व्यवस्थापन एरा प्रोडक्सन प्रा.लि.पाखें कयातःगु दु ।

Categorized in कला