Newa Ekata Diwas Gosthi Adv

समाजसेवाया नामय् ठगी धन्दा न्ह्याकूगु द्वपनय् मिसा प्रहरीया फन्दाय्

नेवा: अनलाइन न्युज – ललेन्द्र शाक्य | २०७७ पौष २४, शुक्रबार ११:५३:५५

समाजसेवाया नामय् ठगीया धन्दा न्ह्याकूगु द्वपनय् छम्ह मिसायात गिरफ्तार याःगु दु ।

इटहरी उपमहानगरपालिका ४ सुनसरीया २४ दँया विद्या शर्मा नांयाम्ह विद्या सरकारयात प्रहरीं गिरफ्तार याःगु खः ।

उम्ह मिसायात बिहिवाः दैलेख प्रहरीं सार्वजनिक याःगु खः । दैलेख प्रहरीया समन्वयस महानगरीय प्रहरी परिसर टेकु येँपाखें उम्ह मिसायात गिरफ्तार याःगु खः ।

थःत अभियन्ता व समाजसेवीया रुपं म्हसीका बिइम्ह विद्या छुं ई न्ह्यः कोरोना महामारीया इलय् दैलेखतक थ्यंकाः राहत इनेगु ज्या याःम्ह खः ।

दैलेखया नारायण नगरपालिकाय् थ्यंकूम्ह विद्यां थः अन्तर्राष्ट्रिय सिंगापुर रेडक्रम सोसाइटीया नेपाः प्रमुख (सीईओ) खः धासें थीथी ठगी सम्बन्धीया गतिविधि याःगु जिल्ला प्रहरी ज्याकुथि दैलेखया डिएसपी अनुपम श्रेष्ठं जानकारी ब्यूगु दु ।

डिएसपी श्रेष्ठया कथं विद्यां गुबलें मृतात्माया शान्तिया नितिं, गुबलें सामाजिक सेवा व अभियानया नितिं धकाः आपालं मनूतपाखें दां म्हयाः मनूतय्त पीडित याःगु खः ।

लकडाउनया इलय् वंगु असारय् दैलेख थ्यंकूम्ह विद्यां थःगु संस्थां स्थानीय तहलय् स्वास्थ्य हलंज्वलं व राहत इनेगु जिम्मा थःत ब्यूगु धासें छुं स्थानीय तहलय् स्वास्थ्य हलंज्वलं व खाद्यान्न इनेगु ज्या याःगु खः ।

विद्यां स्थानीय तहया समन्वयस स्वास्थ्य हलंज्वलं, त्रिपाल, सेनिटाइजर, मास्क, पञ्जा व खाद्यान्न इनेगु ज्या याःगु खः ।

थःत अमेरिकाया नितिं भिसा लाःगु व थःम्हं च्याम्ह झिम्ह युवापिन्त अमेरिका छ्वयेफु धासें युवापिन्त प्रलोभन क्यंगु सीदूगु नं डिएसपी श्रेष्ठं धाःगु दु ।

प्रलोभन क्यनां विद्यां कार्तिक १४ गते नारायण नगरपालिका १ नयाँबजाःया मनोज थापायात बैंकपाखें ९० हजार तका दां जम्मा याकेबियाः ठगी याःगु उजुरी तकं वःगु दैलेख प्रहरीं जानकारी ब्यूगु दु । उगु दिंनिसें मनोजलिसे विद्या सम्पर्कविहीन जूगु खः ।

विद्यां नारायण नगरपालिका १ या २८ दँया विवेक थापायात नं अमेरिका छ्वयेगु प्रलोभनय् लाकाः बैशाख ३१ गतेनिसें असोज १८ गतेतक ५२ लख १४ हजार १० तका दां छ्वयेके बियाः सम्पर्कविहीन जूगु खः ।

ठगी कसुर अन्तर्गत विवेकया जाहेरी दरखास्त लायेधुंकाः प्रहरीं अदालतपाखें पुस ९ गते गिरफ्तारी अनुमति काःगु खः ।

प्रहरीया कथं निगू जक उजुरी दर्ता जूसां नं यक्वसित समाजसेवा व अमेरिका छ्वयेगु प्रलोभनय् थ्यंमथ्यं २ करोडसिबें अप्वः ठगी याःगु अनुमान याःगु दु ।

राहत इनेगु हे नितिं धकाः थीथी व्यापारिक संस्थापाखें हलंज्वलं काःगु तर दां मब्यूगु मौखिक गुनासो प्रहरी न्ह्यःने दु ।

Categorized in दुर्घटना-अपराध