nepal investment baink

समाजवादी मोर्चापाखें ब्यागलं जुल उपेन्द्र यादव, वारपारया लडाईँ ल्वाइगु प्रचण्डलिसे आः

नेवा: अनलाइन न्युज – ललेन्द्र शाक्य | ने.सं. ११४४ बछलाथ्व सप्तमी (२०८१ जेष्ठ २ गते) बुधवाः

उपेन्द्र यादव समाजवादी मोर्चापाखें ब्यागलं जूगु दु ।

थःगु पार्टी हे प्रधानमन्त्री पुष्पकमल दाहाल प्रचण्डं कुचा याःगु निष्कर्ष पिकयाः यादवं मोर्चापाखें ब्यागलं जुइगु निर्णय याःगु खः । थः विदेशय् वनाच्वंगु इलय् असन्तुष्ट नेतापिन्त छ्यलाः पार्टी कुचा याःगु धासें यादवं सार्वजनिक रुपं हे माओवादीया आलोचना याःगु दु ।

यादवं आः कुचा जुइगु पाः नं प्रचण्डया हे पार्टीया जूगु धकाः दाबी याःगु दु । आः मोर्चाया संयोजक नेत्रविक्रम चन्द विप्लव दु । विप्लवं मोर्चाय् एमालेयात नं सहभागी याकेगु कथं पहल याःगु दु । तर, एमालें धाःसा आः मोर्चाय् सहभागी मजुइगु सन्देश ब्यूगु दु ।

आः, उपेन्द्र यादव पिहाँ वयेधुंकाः धाःसा एमालें नं मोर्चाया नेतृत्व यायेगु कथं पहल यायेफइगु चर्चा जूगु दु ।

प्रधानमन्त्री प्रचण्डं सरकारपाखें माधव नेपालया दलयात नं वांछ्वयेगु कथं थःत मुभ याःगु दु । माधव नेपालया दलया पलेसा नागरिक उन्मुक्ति पार्टी व जनमत पार्टीयात सरकारय् सहभागी याकेत प्रचण्डयात एमाले नेतृत्वपाखें दबाब लाःगु दु ।

उपेन्द्र यादवं धाःसा पार्टीया केन्द्रीय कमिटीया बैठक समापन यायेगु झ्वलय् आः प्रचण्डलिसे छक्वः वारपारया लडाईं ल्वायेगु उद्घोष याःगु दु ।
थःलिसेया लडाईं प्रचण्डया नितिं थिके जुइगु उपेन्द्र यादवं ख्याच्वः ब्यूगु दु ।

Categorized in राजनीति